1 րոպեի ընթերցում
Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսին անհրաժեշտ է համարում, որ կազմակերպությունը փորձի հասնել իր փորձագետների ներկայության Հյուսիսային Կորեայում։ «Արմենպրես»-ի փոխանցմամբ՝ այս դիրքորոշումը նա հայտնել է Տոկիոյում կայացած մամուլի ասուլիսում։
«Կարծում եմ, որ մենք պետք է փորձենք հասնել ԱԷՄԳ-ի որոշ ներգրավվածության, որոշ ներկայության վերականգնման այդ երկրում», - Գրոսիի խոսքերն է մեջբերում ՏԱՍՍ-ը։
ԱԷՄԳ-ի գլխավոր տնօրենի կարծիքով՝ այդ փոխգործակցությունը կարող է վերաբերել «միջուկային անվտանգությանը»։
Դրա հետ մեկտեղ Գրոսին խոստովանել է, որ «դա ավելի հեշտ է ասել, քան անել»:
«Վերջին անգամ մենք այնտեղ տեսչական ստուգում ենք անցկացրել 2009 թվականին՝ շատ վաղուց», - հավելել է նա։
ԱԷՄԳ-ի գլխավոր տնօրենի խոսքով՝ այդ հարցում աջակցություն կարող են ցույց տալ Ճապոնիան և Չինաստանը, ինչպես նաև այլ երկրներ, հատկապես նրանք, որոնք «պաշտպանում են միջուկային զենքի չտարածման ռեժիմը»: