Սիգի ապօրինի որսի կանխարգելման միջոցառումները Գեղարքունիքի մարզում շարունակվում են

ԳԱՎԱՌ, 9 ՀՈՒՆՎԱՐԻ, ԱՐՄԵՆՊՐԵՍ։ Պատկան մարմինների կողմից Սևանա լճում 2024 թվականի դեկտեմբերի 9-ից շարունակվում են սիգի ապօրինի որսի կանխարգելման խստացված միջոցառումները։

Ինչպես «Արմենպրես»-ը տեղեկացավ ՀՀ բնապահպանական և ընդերքի տեսչական մարմնի տարածած հաղորդագրությունից, ՀՀ շրջակա միջավայրի նախարարության Էկոպարեկային ծառայության,  Բնապահպանության և ընդերքի տեսչական մարմնի,  ՀՀ ոստիկանության աշխատակիցները սիգի ձվադրման ժամանակաշրջանով պայմանավորված որսի և վաճառքի արգելքի ընթացքում 2024 թվականի դեկտեմբերի 9-26-ի խստացված շուրջօրյա միջոցառումների ժամանակ մայրաքաղաքի ու ՀՀ մարզերի շուկաներում և բացօթյա վաճառակետերում, մայրուղիներում, Սևանա լճի ջրային ավազանում ու ափամերձ տարածքներում հայտնաբերել և առգրավել են 32 լողամիջոց, 695 կգ ձուկ, 1 ապօրինի վաճառք, 3 ապօրինի տեղափոխում, 6 ձկնագողություն։ Այդ ժամանակահատվածում լճից դուրս է բերվել 879 ձկնորսական ցանց, 119 խեցգետնորսիչ։  Շրջակա միջավայրին պատճառված վնասի չափը կազմել է  3 միլիոն 473 հազար 830 դրամ։ Հարուցվել է 3 վարչական և 7 քրեական վարույթ։

Առգրավված ձկները համապատասխան փորձաքննությունից հետո հանձնվել են հատուկ խնամքի կարիք ունեցող անձանց կենտրոններ։ Ոչ պիտանի ձկնաքանակը ոչնչացվել է՝ սահմանված կարգի համաձայն։

Շուրջօրյա խստացված վերահսկողություն  է իրականացվել  նաև Ամանորի և Սուրբծննդյան  տոնական օրերին, շուրջօրյա ռեժիմով։    

Վարդենիս համայնքի, Կարճաղբյուր բնակավայրի լճի ափամերձ հատվածում 2024 թվականի դեկտեմբերի 30-ի գիշերը,  ժամը 22։00-ի սահմաններում,  նկատվել է լճից դուրս եկող ձկնորսական նավակ։Որսագողերը դիմել են փախուստի՝ դեպքի վայրում թողնելով ռետինե նավակ, որում առկա է եղել 560 հատ՝ 207 կգ ընդհանուր քաշով սիգ։ Ձկնապաշարին հասցված վնասը կազմել է 1 միլիոն 35 հազար դրամ։

Նյութերը փոխանցվել են իրավապահ մարմիններին։ Ընթանում են իրավախախտների հայտնաբերման աշխատանքներ։

2025 թվականի հունվարի 8-ին, ժամը 20։20-ի սահմաններում նկատվել է Սևանա լճից ափ դուրս եկող ձկնորսական նավակ։

Ծովագյուղի բնակիչներ Ղ.Գ.-ն և Ս.Ա.-ն սիգի որսի արգելքի ընթացքում ապօրինի որսացել էին 135 հատ 54 կգ սիգ տեսակի ձուկ։

Ձկնորսական նավակը և ձկնապաշարն առգրավված է, իրավախախտները տեղափոխվել են ՆԳՆ ոստիկանության բաժին։ 

Հունվարի 9-ին, ժամը 2։15-ի սահմաններում,  Ջիլ բնակավայրի ափամերձ հատվածում ձկնագողերը, հեռվից նկատելով տեսուչներին, թողնելով 410 կգ ապօրինի որսված սիգ տեսակի ձուկ,  դիմել են փախուստի։

Իրականացվում են ձկնագողերի հայտնաբերման աշխատանքներ։