Մարտունու մշակույթի կենտրոնում տեղի է ունեցել ազգային պարերի ուսուցման միջոցառում

Գեղարքունիքի մարզի Մարտունի քաղաքի Մշակույթի կենտրոնում տեղի է ունեցել  ազգային պարի ուսուցման մեծ միջոցառում, որը նախաձեռնել և կազմակերպել էր Ներքին Գետաշենում գործող «Կոթ» ազգային պարի խումբը։

Ինչպես «Արմենպրես»-ին տեղեկացրին Մարտունու համայնքապետարանի աշխատակազմից, միջոցառման հյուրերն են եղել  «Կայթ» մշակութային հանգույցի ներկայացուցիչները։ Միջոցառմանը մասնակցել են Մարտունի համայնքի վեց գյուղական բնակավայրերի երեխաներ և երիտասարդներ։

Ծրագիրը մեկնարկել է  ներածական հատվածով, որի ընթացքում անդրադարձ է  կատարվել  ազգային մշակույթի, հայկական պարի և ազգային ինքնության պահպանման կարևորությանը։ Այնուհետ  երեխաների ակտիվ մասնակցությամբ տեղում հորինվել են  երգեր, ներկայացվել  ստեղծագործական փոքրիկ կատարումներ։

Միջոցառման երկրորդ մասը շարունակվել է  մշակույթի կենտրոնի բացօթյա հրապարակում, որտեղ անցկացվել է   հայկական ազգային պարերի ուսուցում։ Մասնակիցները սովորել են  հայկական ազգային պարեր։

«Նման նախաձեռնությունները կարևոր դեր ունեն ազգային արժեքների պահպանման, համայնքային կյանքի ակտիվացման և երիտասարդների համախմբման գործում։ միջոցառումն անցավ բավականին հագեցած օրակարգով»,-ներկայացրին Մարտունու համայնքապետարանի աշխատակազմից