Քաղաքաշինության կոմիտեի նախագահն այցելել է Արեգնադեմի դպրոցի շինարարական հրապարակ

ԵՐԵՎԱՆ, 9 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության քաղաքաշինության կոմիտեի նախագահ Եղիազար Վարդանյանը շրջայց է կատարել կոմիտեի պատվիրատվությամբ Շիրակի մարզում  կառուցվող Արեգնադեմի միջնակարգ դպրոցի շինարարական հրապարակում։ Նա դիտարկել է կատարված աշխատանքների որակը, տեմպը և ավարտական փուլի աշխատանքների ծավալը։

Ինչպես «Արմենպրես»-ը տեղեկանում է Քաղաքաշինության կոմիտեի տարածած հաղորդագրությունից, շինարարական կազմակերպության ներկայացուցիչը հայտնել է, որ նախատեսված ծավալը սահմանված ժամանակացույցի համաձայն ապահովելու նպատակով շինարարական հրապարակում աշխատում է շուրջ 50 աշխատակից՝ երկու հերթափոխով։ Շինարարական հիմնական աշխատանքներն ավարտված են, ընթացքում է ներքին հարդարման, արտաքին բարեկարգման, էլեկտրամատակարարման և ջրամատակարարման ցանցերի միացման աշխատանքերի որոշ մասը։

Կոմիտեի նախագահը կարևորել է, որ այլ ծրագրերի շրջանակում տիպային նախագծերով դպրոցի կառուցման ընթացքում արձանագրված թերությունները չկրկնվեն, և ծրագիրն իրականացվի որակի սահմանված նշաձողին համապատասխան։ 

Արեգնադեմի միջնակարգ դպրոցի շինարարական աշխատանքները մեկնարկել են 2021 թվականի հոկտեմբերին։ Դպրոցն ունենալու է մարզադահլիճ և հանդիսությունների սրահ, ապաստարան՝ հագեցած օդափոխության ժամանակակից համակարգով և դիզել-գեներատորով, խաղահրապարակ, արևային ֆոտովորտային կայան։