Քաղաքաշինության կոմիտեի նախագահը կառուցապատողների հետ քննարկել է բնակարանային ֆոնդի ռենովացիայի հնարավորությունները

Հայաստանի քաղաքաշինության կոմիտեում կայացել է կառուցապատող ընկերությունների ներկայացուցիչների հետ հանդիպում, որի ընթացքում քննարկվել են Հայաստանի բնակարանային ֆոնդի ռենովացիայի ծրագրերի իրականացման հնարավորությունները։

Ինչպես «Արմենպրես»-ը տեղեկանում է Կոմիտեի տարածած հաղորդագրությունից, կառույցի նախագահ Եղիազար Վարդանյանը ներկայացրել է ռենովացիայի վերաբերյալ ընդհանուր մոտեցումները։ Քննարկվել են կառուցապատողների առաջարկները, դիտարկվել ծրագրերի իրագործման հնարավոր ուղղություններն ու մեխանիզմները։

Կոմիտեից հավաստիացնում են, որ կառուցապատող տարբեր ընկերությունների հետ հանդիպումները շարունակական են լինելու՝ բոլոր առաջարկները քննարկելու և ռենովացիայի ծրագիրն ամբողջացնելու նպատակով։