Միրզոյանի խոսքով՝ երրորդ երկրների միջոցով Ադրբեջանում պահվող հայերին այցելելու փորձերը չեն հաջողվել

Հայաստանի արտաքին գործերի և միջազգային առևտրի նախարար Արարատ Միրզոյանը հայտնել է, որ Հայաստանը գործընկեր երկրներին դիմել է Ադրբեջանում պահվող հայերին այցելելու հարցով, սակայն այդ փորձերն արդյունք չեն տվել։

«Արմենպրես»-ի հաղորդմամբ՝ Միրզոյանն այդ մասին ասել է Ազգային ժողովում Կառավարության հետ հարցուպատասխանի ընթացքում՝ պատասխանելով պատգամավոր Լիլիթ Գալստյանի հարցին։

Պատգամավորը հարցրել է՝ միջազգային իրավունքի ի՞նչ մեխանիզմներով է Հայաստանը դիմել երրորդ երկրներին և ի՞նչ պատճառաբանությամբ են այդ նախաձեռնությունները մերժվել։ Նա նաև հիշատակել է նախարարի՝ նախկինում արված հայտարարությունը, թե Ադրբեջանը՝ ի պատասխան այդ ջանքերի, ասել է՝ «մեզանից հեռու խաղացեք»։

Միրզոյանը հստակեցրել է, որ Ադրբեջանի այդ արձագանքն ուղղվել է միջնորդող երկրներին, ոչ թե Հայաստանին։

«Երրորդ երկրներին են ասել՝ հեռու խաղացեք»,- նշել է Միրզոյանը։

Նախարարը բացատրել է, որ միջազգային պրակտիկայում գործում է մեխանիզմ, երբ որևէ երկրում ներկայացվածություն չունեցող պետությունը գործընկեր երկրին խնդրում է իր քաղաքացիներին հյուպատոսական աջակցություն ցուցաբերել, այդ թվում՝ այցելել ազատազրկման վայրում։ Նրա խոսքով՝ Հայաստանը դիմել է ընդհանուր գործընկերներին, սակայն նախաձեռնությունը չի հաջողվել։

Միրզոյանը միաժամանակ ընդգծել է, որ Ադրբեջանում պահվող հայերի հարցը մշտական օրակարգի մաս է։ Նա նշել է, որ ձեռնարկված բոլոր քայլերի հրապարակումը նպատակահարմար չի համարում։

«Արել ենք բաներ, որոնք այս ամբիոնից կարող եմ ասել, արել ենք բաներ, որոնք այս ամբիոնից չէի ուզի ասել, որովհետև այլ երկրների անուններ պիտի տամ և նրանց վատ դրության մեջ, գուցե, դնեմ։ Չէի ուզի, դա կվնասի մեր միջազգային կապերին»,- ասել է նախարարը։

Նրա խոսքով՝ հարցի զգայունությունը պահանջում է ուշադրությունը կենտրոնացնել արդյունքի վրա։

«Ինչո՞ւ չեմ սիրում դա անընդհատ ասել, որովհետև այնքան զգայուն հարց է՝ կամ արդյունք կա, կամ չկա»,- նշել է Միրզոյանը։

Գալստյանն արձագանքել է, որ չի պահանջում հրապարակել երկրների անունները, այլ խնդրում է ներկայացնել կիրառված միջազգային մեխանիզմներն ու ստացված պատասխանների բովանդակությունը։ Նա այդ համատեքստում հիշատակել է միջազգային կոնվենցիաներն ու ՄԻԵԴ գործիքները։

«Մենք այստեղ ունենք ճանապարհ, աշխատում ենք այդ ուղղությամբ, և այդ ճանապարհն ուղիղ անցնում է Ադրբեջանով»,- հայտարարել է Արարատ Միրզոյանը։