Փաշինյանի կարծիքով՝ քաղաքական ուժերն իրենց խոսքի համար պետք է պատասխան տան ընտրություններում

Վարչապետ Նիկոլ Փաշինյանը զգուշավորության կոչ է արել բանակի և պետական կառույցների վերաբերյալ հայտարարությունների համար պատասխանատվություն սահմանելու հարցում՝ ընդգծելով ժողովրդավարության և զինված ուժերի նկատմամբ քաղաքացիական վերահսկողության կարևորությունը։ «Արմենպրես»-ի հաղորդմամբ՝ Ազգային ժողովում կառավարության հետ հարցուպատասխանի ընթացքում Փաշինյանն այս մասին ասել է՝ պատասխանելով պատգամավոր Սարիկ Մինասյանին։

Պատգամավորն առաջարկել է քննարկել բանակի և պետական կառույցների վերաբերյալ նվաստացնող հայտարարություններով հանդես եկող քաղաքական ու հասարակական գործիչների համար վարչական, որոշ դեպքերում նաև քրեական պատասխանատվություն նախատեսելու հարցը։

Փաշինյանը պատասխանել է, որ հասկանում է պատգամավորի հույզերը, սակայն նման նախաձեռնությունները կարող են վտանգներ պարունակել։

«Շատ զգույշ պետք է լինենք նման բաների և նախաձեռնությունների մասին խոսելիս, որովհետև դա կարող է էականորեն վնասել ժողովրդավարությանը, որը մեզ համար ունի սկզբունքային նշանակություն։ Կարևոր է, որ զինված ուժերը լինեն քաղաքացիական վերահսկողության ներքո»,- հայտարարել է վարչապետը։

Նա հիշատակել է նախկինում բանակի մասին չխոսելու մոտեցումը՝ նշելով, որ դրա հետևանքները տեսանելի են եղել։ Փաշինյանի գնահատմամբ՝ այդ մոտեցումը կարող է ծխածածկույթ ստեղծել իրական խնդիրների շուրջ։

Վարչապետը շեշտել է, որ քաղաքական հայտարարությունների համար պատասխանատվության հիմնական մեխանիզմը պետք է լինի ընտրողների գնահատականը։

«Հենց ժողովրդավարությունն այդպես էլ պետք է աշխատի, որ մարդիկ այստեղից իրենց ասածի համար պետք է պատասխան տան, բայց ընտրություններում»,- ասել է Փաշինյանը։

Նրա գնահատմամբ՝ պատգամավորի հիշատակած ընդդիմությունն արդեն պատասխան է ստացել ՏԻՄ ընտրություններում և այժմ պետք է որոշի՝ շարունակելո՞ւ է նույն գործելակերպը։

«Քաղաքական ուժերն էլ են իրենց խոսքի համար պատասխան տալիս բոլոր դեպքերում։ Եվ այդ պատասխանը պետք է տան ընտրություններում։ Դա պետք է լինի քաղաքական և ոչ թե վարչական կամ քրեական պատասխանատվություն՝ բացառությամբ այն դեպքերի, որոնք ընդունված են բոլոր ժողովրդավարական երկրներում»,- եզրափակել է վարչապետը։