ԵՄ-ն անհանգստություն է հայտնել Ադրբեջանում անկախ լրագրողների և իրավապաշտպանների ձերբակալությունների առնչությամբ
3 րոպեի ընթերցում
ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ։ Եվրոպական միությունն իր անհանգստությունն է հայտնել Ադրբեջանում տեղի ունեցած վերջին ձերբակալությունների հետ կապված և կոչ է արել Բաքվին բոլոր ձերբակալվածների համար ապահովել թափանցիկություն և պատշաճ ընթացակարգ, ինչպես նաև արժանապատիվ և անվտանգ պայմաններ։
«Արմենպրես»-ի հաղորդմամբ՝ այս մասին նշված է ԵԽ-ում ԵՄ պատվիրակության հայտարարության մեջ։
Հաղորդագրության մեջ ասվում է, որ ԵՄ-ն ի գիտություն է ընդունում Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեի 114-րդ լիագումար նիստում (2024թ. հուլիս) Ադրբեջանի վերաբերյալ հրապարակային հայտարարությունը:
«Մենք ցավում ենք ԽԿԿ-ի հետ Ադրբեջանի իշխանությունների համագործակցության մշտական բացակայության համար և կոչ ենք անում Ադրբեջանի իշխանություններին վերսկսել կառուցողական երկխոսությունը կոմիտեի հետ:
Մենք կոչ ենք անում Ադրբեջանի իշխանություններին անդրադառնալ Կոմիտեի հայտարարության մեջ բարձրացված հարցերին՝ իրենց միջազգային պարտավորություններին համապատասխան, ներառյալ այն պարտավորությունները, որոնք Ադրբեջանը ստանձնել է՝ որպես Եվրոպայի խորհրդի անդամ», - նշված է հայտարարության մեջ, որում նաև ընդգծվում է, որ ԵՄ-ն անհանգստացած է Ադրբեջանում տեղի ունեցած վերջին ձերբակալություններով, որոնք ավելացնում են անցյալ տարվանից անկախ լրագրողների, իրավապաշտպանների և քաղաքացիական հասարակության ներկայացուցիչների ձերբակալությունների մտահոգիչ միտումը:
ԵՄ-ն կոչ է արել Ադրբեջանին ապահովել թափանցիկություն և պատշաճ ընթացակարգ, ինչպես նաև արժանապատիվ և անվտանգ պայմաններ բոլոր ձերբակալվածների համար, ներառյալ նրանց լիարժեք հասանելիությունը առողջապահական և անկախ իրավաբանական ծառայություններին, ինչպես նաև լուծել խոշտանգումների և անմարդկային կամ նվաստացնող վերաբերմունքի կամ պատժի հետ կապված լուրջ էական խնդիրները:
«Եվրամիությունը հանձնառու է շարունակել իր երկխոսությունը Ադրբեջանի հետ մեր համագործակցության բոլոր առանցքային ոլորտներում, ներառյալ մարդու իրավունքները և օրենքի գերակայությունը՝ մեր ընդհանուր միջազգային պարտավորություններին համապատասխան», - շեշտել է ԵՄ-ն: