Պետբյուջեից ավելի քան 3 մլրդ դրամ կհատկացվի մի շարք ճանապարհների հիմնանորոգման և վերանորոգման համար
2 րոպեի ընթերցում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Պետական բյուջեում վերաբաշխում կարվի և 3 մլրդ 400 մլն դրամ կհատկացվի մի շարք ճանապարհահատվածների հիմնանորոգման ու այլ աշխատանքների համար:
«Արմենպրես»-ի փոխանցմամբ՝ որոշման նախագիծը հավանություն ստացավ կառավարության նիստում:
«Նախագծով առաջարկվում է մի շարք ճանապարհահատվածների հիմնանորոգման, նախագծերի, փորձաքննությունների, տրանսպորտային օբյեկտների, ինչպես նաև ավարտված օբյեկտների համար գումար հատկացնել: Ընդհանուր հատկացումը և վերաբաշխվող գումարը 3 մլրդ 400 մլն դրամ է, որի մեջ ներառված է 8 հիմնանորոգվող օբյեկտ, 3 տրանսպորտային օբյեկտ, 7 նախագիծ և 5 օբյեկտ, որոնց շինարարությունն ավարտվել է, և պետք է վճարել»,–ասաց Տարածքային կառավարման և ենթակառուցվածքների նախարար Գնել Սանոսյանը:
Վարչապետ Նիկոլ Փաշինյանը թվարկեց նախագծերը: Դրանցից են Սպիտակից Վանաձոր ավտոճանապարհի 11.9 կմ-անոց հատվածի հիմնանորոգումը, Ջրվեժից Գառնի գնացող ավտոճանապարհի 2.7 կմ հատվածի հիմնանորոգումը, Նոր Հաճնից դեպի Աբովյան տանող ավտոճանապարհի, Հրազդան գետի կամրջի վերանորոգումը, դեպի Ծաղկաձորի մարզահամալիր տանող ավտոճանապարհից սկիզբ առնող և դեպի Ծաղկաձորի ճոպանուղի տանող ավտոճանապարհի 5 կմ հատվածի հիմնանորոգումը:
Փաշինյանը կարևորեց հիմնանորոգվող ճանապարհներին միջանկյալ ձևերով նորմալ անցանելիություն ապահովելը: «Սպիտակից Վանաձոր և Դիլիջանից դեպի Վանաձոր գնացող ճանապարհին ճանապարհային նշանները կան դրված, երևում է, որ աշխատանքի փուլում է, բայց ճանապարհն այնքան վատ վիճակում է, որ լրջորեն դժվարանում է անցանելիությունը: Այսինքն՝ բոլոր այդ հատվածներում պետք է շատ թե քիչ տանելի անցանելիություն ապահովենք»,–ասաց վարչապետը: