2 րոպեի ընթերցում
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ։ 2025 թվականին կմեկնարկի նոր քրեակատարողական հիմնարկի կառուցումը։ «Արմենպրես»-ի հաղորդմամբ՝ լրագրողների հետ ճեպազրույցում այս մասին ասաց Արդարադատության նախարար Գրիգոր Մինասյանը։
«Նախագծի մշակման մրցույթը կայացել է, ունենք հաղթող ընկերություն և մինչև հոկտեմբերի վերջ մրցույթի արդյունքներով նախագիծը պատրաստ է լինելու։ Եվ այս տարի, եթե հատուկ ինչ-որ ֆորս-մաժորային դեպք չլինի, կհայտարարենք շինարարության մրցույթի մեկնարկի մասին։ Կարծում եմ, որ մյուս տարի կսկսվի շինարարությունը»,-նշեց Գրիգոր Մինասյանը։
Նախարարի հավաստմամբ՝ տարբեր բարեփոխումներ են իրականացվում մյուս քրեակատարողական հիմնարկներում։
«Մոտ տասն օրից կավարտվի վերանորոգումը և կբացենք «Աբովյան» քրեակատարողական հիմնարկը։ Այն կանանց և անչափահասների քրեակատարողական հիմնարկ է։
Նաև ինչպես տեղյակ եք, վերջերս «Արմավիր» քրեակատարողական հիմնարկում բազմաթիվ քննարկումներ կային ջրի հետ կապված խնդրի մասին։ Ի ուրախություն պետք է նշեմ, որ առաջին անգամ այդ քրեակատարողական հիմնարկում կարողացել ենք ապահովել 24-ժամյա ջրամատակարարում, նաև գերժամանակակից օդափոխության համակարգն է աշխատում։ Քրեակատարողական հիմնարկներում բարեփոխումներն իրականացվում են ամենօրյա ռեժիմով»,-եզրափակեց Մինասյանը։