1 րոպեի ընթերցում
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ։ Ուկրաինայի կենտրոնական Պոլտավա քաղաքի վրա ռուսական ուժերի հարձակման հետևանքով 41 մարդ է զոհվել, 180-ից ավելի մարդ՝ վիրավորվել։ «Արմենպրես»-ի փոխանցմամբ՝ այս մասին տեսաուղերձում հայտնել է Ուկրաինայի նախագահ Վլադիմիր Զելենսկին։
Նա նաև նշել է, որ ըստ նախնական տվյալների՝ քաղաքին հարվածել է երկու բալիստիկ հրթիռ։
«Նրանք թիրախավորել են կրթական հաստատություն և մոտակա հիվանդանոցը՝ մասամբ ավերելով հեռահաղորդակցությունների ինստիտուտի մասնաշենքերից մեկը», - հայտնել է Զելենսկին՝ հավելելով, որ հարվածից հետո մարդիկ հայտնվել են փլատակներում։
Նա խոստացել է, որ հակառակորդը կվճարի այս հարձակման համար, և կրկին զենքեր է խնդրել դաշնակիցներից։
«Մենք շարունակում ենք կոչ անել աշխարհում բոլոր նրանց, ովքեր ի զորու են դադարեցնել այս ահաբեկչությունը՝ Ուկրաինային հակաօդային պաշտպանության համակարգեր և հրթիռներ են հարկավոր հիմա, ոչ թե պահեստում դրված։ Մեծ հեռահարության հարվածները, որոնք կարող են պաշտպանել մեզ ռուսական ահաբեկչությունից, անհրաժեշտ են հիմա, ոչ թե հետո։ Ամեն օրվա հետաձգումը, ցավոք, նշանակում է ավելի շատ զոհեր», - ասել է Ուկրաինայի նախագահը։