ԱՄՆ-ում Թրամփի կողմից Կապիտոլիումը գրոհելու ենթադրյալ փորձի վերաբերյալ դատական լսումներ կանցկացվեն
2 րոպեի ընթերցում
![ԱՄՆ-ում Թրամփի կողմից Կապիտոլիումը գրոհելու ենթադրյալ փորձի վերաբերյալ դատական լսումներ կանցկացվեն](http://armenpress.am/resized/480/storage/images/articles/2024/08/04/TuIKoGkoxhbehiiKF9obljcF2j91E4gI8oDI1Owg.webp)
ԵՐԵՎԱՆ, 4 ՕԳՈՍՏՈՍԻ, ԱՐՄԵՆՊՐԵՍ: ԱՄՆ Կոլումբիայի շրջանային դաշնային դատարանը օգոստոսի 16-ին դատավարություն է նշանակել 2021 թվականի հունվարին Դոնալդ Թրամփի կողմից իշխանությունը պահպանելու ենթադրյալ փորձի գործով։
«Արմենպրես»- ի հաղորդմամբ՝ այս մասին ասվում է դատավոր Տանյա Չաթքենի՝ հրապարակած գրավոր հայտարարության մեջ։
Ընդգծվում է, որ հանդիպումը կանցկացվի ստատուսային լսումների ձևաչափով, իսկ ամբաստանյալի ներկա գտնվելու պահանջը վերացվում է:
Գործը կասեցվել էր փետրվարին՝ մինչ վերաքննիչ դատարանը քննում էր, թե արդյոք Թրամփը անձեռնմխելի է իրավական հետապնդումից այն գործողությունների համար, որոնք նա կատարել է որպես նախագահ:
Հուլիսի 1-ին ԱՄՆ Գերագույն դատարանը որոշել է, որ Թրամփն ունի մասնակի անձեռնմխելիություն, որը վերաբերում է միայն ծառայողական պարտականություններից բխող գործողություններին։
Նոյեմբերի 5-ին կայանալիք նախագահական ընտրություններից առաջ մայրաքաղաքային շրջանային դատարանը գործի վերաբերյալ վերջնական որոշում չի ակնկալում։ Չաթքենը նախկինում մերժել էր գործը հետաձգելու Թրամփի փորձերը, սակայն Գերագույն դատարանի որոշումը խաթարել է դատավարության ժամանակացույցը:
«Դատարանը լրացուցիչ ժամկետներ կսահմանի 2024 թվականի օգոստոսի 16-ին կայանալիք ստատուսային լսումներից հետո»,- նշել է դատավորը։