Թաթայի համերգ, տոնավաճառ, տեղացի արտիստների ելույթներ. երաժշտական-զբոսաշրջային «Ֆեստիվառ» փառատոնը Գյունրիում էր

ԳՅՈՒՄՐԻ, 28 ՀՈՒԼԻՍ, ԱՐՄԵՆՊՐԵՍ: Գյումրիում  հուլիսի 27-ի առավոտյան մեկնարկած «Ֆեստիվառ» զբոսաշրջային-երաժշտական փառատոնը եզրափակվեց երեկոյան՝ «Վարդանանց» հրապարակում, ՀՀ վաստակավոր արտիստ Թաթայի մենահամերգով, նվագակցությամբ՝ «Կարեն Սևակ բենդ»-ի։ Ինչպես տեղեկացնում է «Արմենպրես»-ը, փառատոնն անցկացվում է Հանրային հեռուստաընկերությունը՝ ՀՀ կրթության, գիտության, մշակույթի և սպորտի նախարարությունը նախաձեռնությամբ։

Մինչ համերգը «Ֆեստիվառ» երաժշտական-զբոսաշրջային փառատոնի շրջանակում Գյումրու Աբովյան փողոցում անցկացվեց տեղական արտադրանքի տոնավաճառ։ Քաղաքի հյուրերը և զբոսաշրջիկները հնարավորություն ունեցան համտեսել Գյումրու ավանդական ուտեստներ, ձեռք բերել տարբեր հուշանվերներ և լսել տեղացի արտիստներին:

Շիրակի մարզպետ Մուշեղ Մուրադյանն աշխատակազմի պատասխանատուների, համայնքների ղեկավարների հետ Գյումրու Աբովյան փողոցում մասնակցել է «Ֆեստիվառ» երաժշտական-զբոսաշրջային փառատոնի շրջանակում անցկացվող տեղական արտադրանքի տոնավաճառին։ «Կառավարությունը մեծածավալ միջոցառումները մայրաքաղաքից ապակենտրոնացնում է մարզեր, մարզկենտրոններից էլ՝ հեռավոր համայնքներ: Անվճար տրանսպորտային միջոցներ են տրամադրվել, որպեսզի փառատոնի շրջանակներում ցանկացողներն այցելեն Մարմաշենի վանական համալիր, Հառիճավանք, Երերույքի տաճար և այլ պատմամշակութային վայրեր։ Մենք լիազրորությունների սահմաններում փորձում ենք անել հնարավորն ու անհնարինը, որ կարողանանք ոչ միայն պատշաճ ներկայանալ, այլև մարդկանց այսքան մեծ հոսքն ընդունել։ Նման միջոցառումներին պատրաստվելն ու պատվով հաղթահարելը դարձել է աշխատանքային օրվա բնականոն գործընթաց: Նախորդ տարի նույն ոգևորությամբ Համահայկական խաղերի բացման հանդիսավոր արարողությանը Շիրակի մարզը հյուրընկալեց աշխարհի 42 երկրի 181 քաղաքներից ժամանած հյուրերի և պատվով ճանապարհեց»,- լրագրողների հետ ունեցած ճեպազրույցի ժամանակ նշեց Շիրակի մարզպետը:

Տոնական օրվա առթիվ Մարիամ և Երանուհի Ասլամազյան քույրերի պատկերասրահում տեղի է ունեցել պաշտոնական ընդունելություն, որին ներկա են եղել ՀՀ կրթության, գիտության, մշակույթի և սպորտի նախարար Ժաննա Անդրեասյանը, ՀՀ Շիրակի մարզպետ Մուշեղ Մուրադյանը, Հանրային հեռուստաընկերության գործադիր տնօրեն Հովհաննես Մովսիսյանը, Շիրակի մարզի համայնքների ղեկավարներ, պաշտոնատար այլ անձինք։

Փառատոնի շրջանակներում Գյումրու «Հաղթանակի» պողոտայից ավտոբուսները ցանկացողներին տեղափոխում  էին  Շիրակի մարզի տեսարժան վայրեր:

«Ֆեստիվառ» զբոսաշրջային-երաժշտական փառատոնի շրջանակներում այս տարի   օգոստոսի 10-ին Իջևանում նախատեսվում է հայ-վրացական համերգային մեծ ծրագիր, իսկ օգոստոսի 24-ին Եղեգնաձորում համերգի գլխավոր հյուրը կլինի «Եվրատեսիլ 2024»-ում Հայաստանը ներկայացրած «Լադանիվա» խումբը:

Արմենուհի Մխոյան