ՀՀ ՏԿԵ նախարարն ու Գեղարքունիքի մարզպետը մասնակցել են «Սևան ստարտափ սամիթ-2024» բիզնես ֆորումին

ԳԱՎԱՌ, 23 ՀՈՒԼԻՍԻ, ԱՐՄԵՆՊՐԵՍ։ ՀՀ ՏԿԵ նախարար Գնել Սանոսյանը և Գեղարքունիքի մարզպետ Կարեն Սարգսյանը մասնակցել են հուլիսի 21-27-ը Սևանա լճի ափին՝ Դարանակ գյուղի հարակից ափամերձ տարածքում անցկացվող «Սևան ստարտափ սամիթ -2024» վրանային ոչ պաշտոնական բիզնես ֆորումին։ 

Ինչպես «Արմենպրես»-ը տեղեկացավ Գեղարքունիքի մարզպետի աշխատակազմից, «Սևան ստարտափ սամիթ -2024» տեխնոմիջոցառման կազմակերպիչների ներկայացմամբ՝ միջոցառման շրջանակում մեկ շաբաթ շարունակ տարբեր փուլում գտնվող ստարտափներն իրենց գաղափարներն են ներկայացնում ներդրողներին և մենթորներին, մասնակցում պանելային քննարկումների, սեմինարների, խարույկի շուրջ բանակցությունների, ժամանցային ու այլ միջոցառումների: 

ՀՀ ՏԿԵ նախարարն ու Գեղարքունիքի մարզպետը, մարզպետի տեղակալ Ջանիկ Բազեյանը միջոցառման կազմակերպիչների ուղեկցությամբ շրջել են տաղավարներով և մասնակցել այլընտրանքային էներգետիկայի ոլորտի զարգացմանն ուղղված պանելային քննարկմանը։ Նախարարը և մարզպետը շնորհավորել են միջոցառման մասնակիցներին՝ մաղթելով արդյունավետ ու նորարարական գաղափարների ներկայացմամբ լի աշխատանքային շաբաթ: 

«Սևան ստարտափ սամիթ» վրանային ոչ պաշտոնական բիզնես ֆորումը կազմակերպվում է 2016 թվականից: «Սամիթին» ամեն տարի մասնակցում են հարյուրավոր ստարտափներ, ձեռներեցներ, ներդրողներ, բանախոսներ, մենթորներ աշխարհի տասնյակ երկրներից՝ քննարկելու բիզնես-տեխնոլոգիական գաղափարներ, ներդրումային ծրագրեր, տարբեր թեմաներ: 

«Նման ծավալի միջոցառումը, որտեղ ներգրավված են աշխարհի տասնյակ երկրների ներկայացուցիչներ, չի կարող իր դրական ու տեսանելի ազդեցությունը չթողնել ՀՀ տնտեսության զարգացման ու արդիականացման վրա։ Անշուշտ, այդ արդյունքները տեսանելի են նաև Գեղարքունիքի մարզում, մասնավորապես՝ այլընտրանքային էներգետիկայի զարգացման ոլորտում։ Նույնքան համոզված եմ, որ «Սևան ստարտափ սամիթ-2024»-ի ընթացքում ի հայտ կգան ու կյանքի կկոչվեն ներդրումային նոր ծրագրեր, որոնք առաջ կմղեն մեր տնտեսությունը, գիտությունը, կենսագործունեության մյուս ոլորտները»,-իր տպավորություններով կիսվեց Գեղարքունիքի մարզպետ Կարեն Սարգսյանը։   

Խոսրով Խլղաթյան