2 րոպեի ընթերցում
ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: ԱՄՆ-ն կշարունակի ռազմական համագործակցությունը Վրաստանի հետ` չնայած զորավարժությունների չեղարկմանը։ «Արմենպրես»-ի փոխանցմամբ՝ այս մասին լրագրողների հետ հերթական ճեպազրույցում հայտնել է Պենտագոնի մամուլի քարտուղար Պատրիկ Ռայդերը։
Անդրադառնալով ամռանը ծրագրված վրաց-ամերիկյան «Արժանի գործընկեր» (Noble Partner) զորավարժությունների չեղարկմանը՝ Ռայդերին հարց են ուղղել՝ արդյոք չեղարկվում են Վրաստանի ռազմական գերատեսչության հետ նախատեսված այլ միջոցառումներ։
«Ինձ հայտնի չեն որևէ այլ չեղարկումներ», - հայտարարել է Ռայդերը՝ հավելելով, որ զորավարժությունները չեղարկելու որոշումը հեշտ չի եղել։
Պենտագոնի ներկայացուցիչը նաև վստահեցրել է, որ Վրաստանի ռազմական գերատեսչության հետ գործընկերային կապերը կպահպանվեն։
«Մենք կշարունակենք պահպանել գործընկերային կապերը Վրաստանի զինված ուժերի հետ: Մենք նաև կշարունակենք հնարավորություններ փնտրել՝ ամրապնդելու Վրաստանի հնարավորությունները՝ պաշտպանելու իր ինքնիշխանությունը և պահպանելու տարածքային ամբողջականությունը», - ընդգծել է Ռայդերը։
ԱՄՆ պաշտպանության նախարարությունը հուլիսի 5-ին հայտնել էր, որ ամռանը ծրագրված «Արժանի գործընկեր» վրաց-ամերիկյան զորավարժություններն անորոշ ժամանակով հետաձգվում են երկու երկրների ռազմավարական հարաբերությունների վերանայման պատճառով։