აშშ-მა განაცხადა, რომ გააგრძელებს სამხედრო თანამშრომლობას საქართველოსთან

ერევანი, 17 ივლისი, არმენპრესი․ აშშ გააგრძელებს სამხედრო თანამშრომლობას საქართველოსთან, მიუხედავად სამხედრო წვრთნების გაუქმებისა. „არმენპრესის“ ინფორმაციით, ამის შესახებ ჟურნალისტებთან მორიგ ბრიფინგზე განაცხადა პენტაგონის პრესმდივანმა პატრიკ რაიდერმა.

რაიდერს კითხვა დაუსვეს, გეგმავენ თუ არა სხვა ღონისძიებების გაუქმებას საქართველოს სამხედრო უწყებასთან, მას შემდეგ რაც გაუქმდა ზაფხულში დაგეგმილი ქართულ-ამერიკული სამხედრო წვრთნები „ღირსეული პარტნიორი“ (Noble Partner).

„ჩემთვის უცნობია სხვა გაუქმებები“, - განაცხადა რაიდერმა და დასძინა, რომ წვრთნების გაუქმების გადაწყვეტილება არ იყო მარტივი.

პენტაგონის წარმომადგენელმა ასევე დაადასტურა, რომ საქართველოს სამხედრო უწყებასთან პარტნიორული ურთიერთობები შენარჩუნდება.

„ჩვენ გავაგრძელებთ პარტნიორული ურთიერთობების შენარჩუნებას საქართველოს შეიარაღებულ ძალებთან. ჩვენ ასევე გავაგრძელებთ შესაძლებლობების ძიებას, რათა გავაძლიეროთ საქართველოს უნარი დაიცვას თავისი სუვერენიტეტი და შეინარჩუნოს ტერიტორიული მთლიანობა“, - ხაზგასმით აღნიშნა რაიდერმა.

აშშ-ს თავდაცვის დეპარტამენტმა 5 ივლისს განაცხადა, რომ ზაფხულში დაგეგმილი „ღირსეული პარტნიორი“ ქართულ-ამერიკული სამხედრო წვრთნები გაურკვეველი დროით გადაიდო ორ ქვეყანას შორის სტრატეგიული ურთიერთობების გადახედვის გამო.