ნიკოლ ფაშინიანმა TRIPP-ის მარშრუტი დაასახელა

სომხეთის რესპუბლიკის მთავრობამ პრაქტიკულად უკვე დაიწყო პროექტის „ტრამპის გზა საერთაშორისო მშვიდობისა და კეთილდღეობისთვის“ (TRIPP) განხორციელება.

„არმენპრესის“ ცნობით, ამის შესახებ ეროვნული ასამბლეის მუდმივმოქმედი კომისიების ერთობლივ სხდომაზე, კანონპროექტის „სომხეთის რესპუბლიკის 2027 წლის სახელმწიფო ბიუჯეტის შესახებ“ განხილვის მსვლელობისას პრემიერ-მინისტრმა ნიკოლ ფაშინიანმა განაცხადა.

„სომხეთის მთავრობა, შემდგომი პროცესების ორგანიზებამდე, საკუთარი ინიციატივით დაიწყებს TRIPP-ის პროექტის რკინიგზის, საავტომობილო გზისა და ელექტროგადამცემი ხაზების პროექტირების დაკვეთის საკითხს, რათა დრო არ დავკარგოთ და პროექტის ირგვლივ სამუშაოები დავიწყოთ. იმ მომენტში, როდესაც TRIPP-ის განვითარების კომპანია ჩამოყალიბდება, უკვე შესრულებულ სამუშაოს სომხეთის რესპუბლიკის მთავრობა პირდაპირ კომპანიას გადასცემს“, — განაცხადა პრემიერ-მინისტრმა.

ნიკოლ ფაშინიანმა ხაზი გაუსვა, რომ ამ პროექტით სომხეთი 30 წელზე მეტხანს გაგრძელებულ ბლოკადას გადალახავს.

„უდავო და ცალსახაა, რომ TRIPP-ის პროექტის განხორციელების შედეგად სომხეთი ყველა მიმართულებით განიბლოკება. განიბლოკება აღმოსავლეთ-დასავლეთის, ჩრდილოეთ-სამხრეთის მიმართულებით. ყველა ამ მიმართულებით განბლოკვა არ ნიშნავს იმას, რომ ყველა ინფრასტრუქტურა TRIPP-ის პროექტის ნაწილი იქნება. TRIPP-ის პროექტის შემადგენელი ნაწილი იქნება ნრნაძორ-კარჭევანის რკინიგზა, აგრეთვე ელექტროგადამცემი ხაზები და საავტომობილო გზა. გაზსადენისა და ნავთობსადენის თემები შემდგომი განხილვის საკითხია“, — აღნიშნა ნიკოლ ფაშინიანმა.

28 ოქტომბერს სომხეთის ეროვნულმა ასამბლეამ მოახდინა სომხეთსა და ამერიკის შეერთებულ შტატებს შორის პროექტ TRIPP-ის „ტრამპის გზა საერთაშორისო მშვიდობისა და კეთილდღეობისთვის“ შესახებ სტრატეგიული თანამშრომლობის ჩარჩო შეთანხმების რატიფიცირება.