2 րոպեի ընթերցում
ԵՐԵՎԱՆ, 12 ՕԳՈՍՏՈՍԻ, ԱՐՄԵՆՊՐԵՍ: Հայաստանի մարմնամարզության հավաքականի գլխավոր մարզիչ Հակոբ Սերոբյանի կարծիքով, Օլիմպիական խաղերի ավարտից հետո և բրոնզե մեդալի ոգևորության ֆոնին պետք է առանձնակի մեծ ուշադրություն հատկացնել մարմնամարզության և դահլիճային աշխատանքներին:
«Մենք մեդալի համար էինք գնացել: Գիտեինք, որ Արթուր Դավթյանը ոսկե մեդալի էլ է արժանի: Մենք պատրաստ էինք անգամ օլիմպիական ոսկե մեդալ նվաճելուն: Մենք հավատում էինք, սակայն շատերը չէին հավատում, որ այս պայմաններով կարելի է մեդալ բերել: Հիմա բոլոր մարմնամարզիկները մեծ ոգևորությամբ այլ մրցաշարերի կմասնակցեն»,-«Արմենպրես»-ի մամուլի սրահում` լրագրողների հետ հանդիպման ժամանակ ասաց Սերոբյանը:
Վերջինս շեշտեց, որ Օլիմպիական խաղերում մարզչի կարգավիճակում մեծ աշխատանք է կատարել Հայկ Նազարյանը:
«Եթե նորմալ պայմաններ լինեն, ամեն ինչ այլ կլինի: Բացի այս ոգևորությունից՝ նաև մարմնամարզության համար պայմաններ են պետք: Մեզ միջազգային նորմերին համապատասխան դահլիճ է պետք: Մենք ամեն մրցաշարից մեդալ ունեինք, իսկ հիմա նաև Օլիմպիական խաղերից ունենք: Ժամանակն է, որ խոսեմ այս մասին: Մարզադահլիճի կարիք ունենք: Եվ, ինչու ոչ, թող այն կոչվի Արթուր Դավթյանի անունով»,- ասաց նա:
Մասնագետի խոսքով` Դավթյանը Խաղերից առաջ վնասվածք ուներ, բայց չէր բարձրաձայնում, քանի որ պետք է ապացուցեր, որ ինքը լավագույններից մեկն է և այդպես էլ կա: