3 րոպեի ընթերցում
ԵՐԵՎԱՆ, 18 ՓԵՏՐՎԱՐԻ, ԱՐՄԵՆՊՐԵՍ: Երևանում «Դոմ Մոսկվի» մոսկովյան մշակութագործարարական կենտրոնը (ՄՄԳԿ) այս տարի ևս միացել է Գիրք նվիրելու տոնին։ Ինչպես «Արմենպրես»-ին տեղեկացրին կենտրոնից, տոնին ընդառաջ «Դոմ Մոսկվի»–ին «Ռուսական կենտրոն»–ին նվիրեց գեղարվեստական գրականություն։
«Ռուսական կենտրոն»-ը բացվել է նախորդ տարի «Դոմ Մոսկվի» կենտրոնի նախաձեռնությամբ։ «Ռուսական կենտրոն»-ում երեխաների համար անցկացվում են ռուսերենի անվճար դասընթացներ։ «Գիրք նվիրելու» օրվան ընդառաջ կազմակերպվել է բաց դաս՝ նվիրված ռուս մանկագիր Ագնիա Բարտոյին։ Կրթական կենտրոնի սաները բաց դասի ընթացքում կարդացել են ռուս մանկագրի ստեղծագործությունները։
«Գիրք նվիրելու կարևոր արշավին միանում ենք ամեն տարի և մեծաքանակ գեղարվեստական գրականություն նվիրում։ Այս տարի կարևոր նախաձեռնությունը համընկավ ռուս մանկագիր Ագնիա Բարտոյի ծննդյան տարեդարձի հետ։ Տեսնելով փոքրիկների սերը և ռուսերեն սովորելու մեծ ցանկությունն ու ոգևորությունը՝ մենք էլ ցանկանում ենք ավելի շատ այսպիսի դաընթացներ անցկացնել», - նշել է Երևանում «Դոմ Մոսկվի» կենտրոնի գլխավոր տնօրեն Վահրամ Կարապետյանը։
Մինչև օրս Գիրք նվիրելու տոնի շրջանակում «Դոմ Մոսկվի» կենտրոնը մեծաքանակ գեղարվեստական գրականություն է նվիրել ՀՀ մարզային և դպրոցական գրադարաններին։
Գրքի, ընթերցանության նկատմամբ հետաքրքրությունն ու սերը մեծացնելու նպատակով ամենայն հայոց բանաստեղծ Հովհաննես Թումանյանի ծննդյան օրը՝փետրվարի 19-ը, Հայաստանում նշվում է որպես Գիրք նվիրելու օր։
Տոնն արմատավորվել է Գրողների միության երջանկահիշատակ նախագահ Լևոն Անանյանի նախաձեռնությամբ2008թվականից:
Գիրք նվիրելու օրվաշրջանակում մայրաքաղաքում և ՀՀ մարզերում բազմաթիվ միջոցառումներ են իրականացվում: Գրողներն այցելում են դպրոցներ, հաղորդակցվում աշակերտների հետ և գիրք նվիրում նրանց, գրախանութները տոնի կապակցությամբ գրքերը վաճառում են զեղչված գներով, հրատարակչությունները ընթերցասերներին նոր գրքեր են ներկայացնում, գրադարաններում ընթերցանության միջոցառումներ են կազմակերպվում: