Ադրբեջանի պաշտոնյաներից երբեմն լսում ենք ձևակերպումներ, որոնք, մեղմ ասած, չեն նպաստում խաղաղությանը․ Միրզոյան

Ադրբեջանի պաշտոնյաները երբեմն հանդես են գալիս ձևակերպումներով, որոնք չեն նպաստում խաղաղությանը։ ՀՀ արտաքին գործերի և միջազգային առևտրի նախարար Արարատ Միրզոյանի խոսքով՝ խաղաղության նկատմամբ ադրբեջանական կողմի մոտեցումը միշտ չէ, որ նույնն է․ երբեմն նկատվում է հոգատար վերաբերմունք, երբեմն՝ հակառակը։ «Արմենպրես»-ի հաղորդմամբ՝ Միրզոյանն այս մասին հայտարարել է Ազգային ժողովի արտաքին հարաբերությունների մշտական հանձնաժողովի նիստում՝ արձագանքելով Ադրբեջանի պաշտոնական հռետորաբանության վերաբերյալ պատգամավորի մտահոգություններին։

«Այո՛, երբեմն, այդ թվում՝ պաշտոնյաների կողմից, լսում ենք ձևակերպումներ, որոնք, մեղմ ասած, չեն նպաստում խաղաղությանը։ Ո՞վ կարող է դա հերքել։ Խաղաղության գործը, նույնիսկ եթե մեր իրավիճակից վերացարկվենք, մեր զգացումներից, պահանջում է մշտական խնամք»,-ասել է նախարարը։

Միրզոյանը նշել է, որ չի ներկայացնում իրավիճակը որպես ամբողջությամբ դրական և ընդունում է առկա խնդիրները։ Միաժամանակ նա հարցադրում է արել՝ այդ պայմաններում Հայաստանը պե՞տք է շարունակի հարաբերությունների կարգավորման աշխատանքը, թե՞ հրաժարվի այդ ուղղությամբ արդեն ձեռք բերված արդյունքներից։

Նախարարի գնահատմամբ՝ հակամարտությունից հետո բոլոր հարցերը հնարավոր չէ լուծել միաժամանակ․ իրավապայմանագրային խնդիրներից բացի, անհրաժեշտ է նաև հասարակությունների հաշտեցում, ինչը ժամանակ է պահանջում։

Խոսելով խաղաղության տնտեսական հիմքերի մասին՝ Միրզոյանը շեշտել է, որ փոխադարձ շահագրգռվածությունը պետք է նպաստի դրա պահպանմանը։

«Հակառակը՝ ես ասում եմ՝ փոխշահավետությունն ամեն ինչի՝ հաջողության, խաղաղության գրավականն է։ Ասում եմ՝ մենք շահ ունենք, և Ադրբեջանը շահ ունի, ավելին ասեմ՝ բազմաթիվ երրորդ երկրներ էլ շահ ունեն»,-ընդգծել է նա։