Իրանը պատրաստ է միջնորդ դառնալ ԼՂ հակամարտության կարգավորման հարցում. ՌԴ-ում Իրանի դեսպան
1 րոպեի ընթերցում
ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ: Իրանը ԼՂ հակամարտության կողմերի հետ բանակցություններ է անցկացրել և պատրաստ է միջնորդ դառնալ կարգավորման հարցում: Ինչպես տեղեկացնում է «Արմենպրես»-ը, «Զվեզդա» հեռուստաալիքին տված հարցազրույցում այս մասին ասել է Ռուսաստանում Իրանի դեսպան Քազեմ Ջալալին:
«Մեր նախագահը, մեր արտաքին գործերի նախարարը բանակցություններ են անցկացրել երկու կողմերի հետ, և հայտարարել են այն մասին, որ Իրանը պատրաստ է միջնորդ լինել հակամարտության կարգավորման գործում», - ասել է Ջալալին:
Ավելի վաղ, իրանական «Irna» գործակալությունը հայտնել էր, որ Իրանի արտաքին գործերի նախարարի տեղակալ Աբբաս Արագչին կժամանի Երևան: Նախատեսված են նաև նրա այցերը Բաքու, Մոսկվա և Անկարա՝ Լեռնային Ղարաբաղի հակամարտության կարգավորման հարցում Իրանի նախաձեռնողականությունն առաջմղելու նպատակով: