Էրեբունի-Երևանի օրվա հետաձգված միջոցառումները կտոնենք մեր ընդհանուր հաղթանակի հետ. Հայկ Մարության
2 րոպեի ընթերցում
ԵՐԵՎԱՆ, 11 ՀՈԿՏԵՄԲԵՐԻ, ԱՐՄԵՆՊՐԵՍ: Արցախում ստեղծված իրավիճակով պայմանավորված՝ Էրեբունի-Երևանի օրվա միջոցառումները հետաձգվել են, և քաղաքապետ Հայկ Մարությանը վստահեցնում է, որ քաղաքի օրը կնշվի ընդհանուր հաղթանակի հետ:
«Արմենպրես»-ի հաղորդմամբ՝ այս մասին Մարությանը գրել է «Ֆեյսբուքի» իր էջում:
«Այսօր Էրեբունի-Երևանի օրն է: Տոնական միջոցառումները, հասկանալի է, հետաձգվել են. քաղաքի օրը մենք կտոնենք մեր ընդհանուր հաղթանակի հետ միասին: Իսկ այսօր եկեք արձանագրենք, որ մենք, պահելով Արցախի սուրբ հողը, պահում ենք նաև Էրեբունի ամրոցի հազարամյա պատերը, պահում ենք Օպերան ու Ազգային պատկերասրահը, Սուրբ Սարգիս տաճարն ու Մատենադարանը: Հաղթանակից հետո մենք կվերակառուցենք Արցախում բարբարոսի հարվածից տուժած մեր քաղաքները ու է՛լ ավելի կշենացնենք դրանք՝ հազարերորդ անգամ ապացուցելով, որ հայի հաստատակամությունն ու ապրելու կամքը անխորտակելի են: Եվ ես վստահ եմ, որ այսուհետև մեր օրացույցում միայն տոնական ամսաթվեր են ավելանալու: Ուրիշ հեռանկար չկա: Որովհետև մեր գործն արդար է, հաղթանակը՝ անխուսափելի»,- նշել է Երևանի քաղաքապետը:
Նրա խոսքով՝ այս օրերինմեր մարդկանց ամբողջ ջանքը, մտքերն ու աղոթքները ուղղված են դեպի Արցախ: Մարությանն ընդգծում է, որ թշնամու ահաբեկչական բանակների պարտադրած ահռելի պայքարում յուրաքանչյուրն իր ոլորտում լծվել է Հայրենիքի պաշտպանության ու հաղթանակի սուրբ գործին:
«Վստահ եմ, որ մեր սերունդները, այս օրերի մասին հիշելիս, մեր տղաների սխրանքին ձոնված հերոսապատումների կողքին, պատմելու են նաև միասնականության ու նվիրումի ոգու մասին, որ այս օրերին թևածում է մեզանում: Փա՜ռք հերոսներին, փա՜ռք միասնական հայությանը, կեցցեն՜ հավերժական Հայաստանն ու Արցախ աշխարհը»,- նշել է Հայկ Մարությանը: