Հայկ Մարությանը խոստացավ քաղաքացիական անհնազանդության ակցիաներ սկսել տրանսպորտի սակագնի բարձրացման դեմ
1 րոպեի ընթերցում
![Հայկ Մարությանը խոստացավ քաղաքացիական անհնազանդության ակցիաներ սկսել տրանսպորտի սակագնի բարձրացման դեմ](http://armenpress.am/resized/480/static/news/b/2024/02/1129745.jpg)
ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ։ Երևանի նախկին քաղաքապետ Հայկ Մարությանն անդրադարձել է Երևանի հասարակական տրանսպորտի միասնական տոմսային համակարգ ներդնելու նախագծին, որը նաև ենթադրում է հասարակական տրանսպորտի սակագնի բարձրացում։
«Արմենպրես»-ի փոխանցմամբ՝ Մարությանը հարցին անդրադարձավ Երևանի ավագանու արտահերթ նիստի ժամանակ իրեն ավագանու անդամի մանդատից զրկելու հարցի քննարկման ժամանակ ունեցած ելույթում։
Մարությանը հայտարարեց, որ ավագանու իշխող խմբակցությունը՝ ՔՊ-ն, ներկայացնելու է հանրային տրանսպորտը ավելի քան կրկնակի թանկացնելու նախագիծ։ Նրա խոսքով՝ այդ նախագիծը ներկայացվում է առանց ադեկվատ հաշվարկի ու տրամաբանական հիմնավորման։
Երևանի նախկին քաղաքապետը հայտարարեց, որ ՔՊ-ն չի կարողանալու իրականություն դարձնել այդ նախագիծը՝ նույնիսկ այն դեպքում, եթե կարողանան ավագանու հերթական նիստում այն քվեարկել և անցկացնել։
«Ինչպես տասնմեկ տարի առաջ, այնպես էլ հիմա դիմելու ենք քաղաքացիական անհնազանդության բոլոր միջոցներին՝ հրաժարվելու ենք վճարել ձեր ուզած գներով, մարդկանց մեր մեքենաներով տեղ ենք հասցնելու։ Այնպես, ինչպես 150 դրամների մեր նախորդ պայքարի ժամանակ»,- հայտարարեց Մարությանը։