Երևանում՝ 11:07,   25 Մայիս 2024

Կնեսետի պատգամավորը Նեթանյահուին հորդորել է միջամտել Լապշինի գործին

Կնեսետի պատգամավորը Նեթանյահուին հորդորել է միջամտել Լապշինի գործին

ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: Իսրայելի Կնեսետի պատգամավոր Քսենիա Սվետլովան բլոգեր Ալեքսանդր Լապշինի ճակատագրի համար պատասխանատու է հայտարարել Իսրայելի վարչապետ Բենյամին Նեթանյահուին և պաշտպանության նախարար Ավիգդոր Լիբերմանին: Ինչպես հաղորդում է «Արմենպրես»-ը, պատգամավորն իր զայրույթն է արտահայտել Լապշինի գործով Իսրայելի իշխանությունների կողմից պահպանվող լռության առնչությամբ:

«Ալեքսանդրը հանցագործ չէ, նա չի գողացել, չի սպանել, չի վտանգել որևէ երկրի անվտանգություն: Նրա հանցանքը Լեռնային Ղարաբաղ այցելել էր»,- նշել է պատգամավորը:

Նա ընդգծել է, որ վեջին երկու ամիսներին ընթացքում Լապշինի ընտանիքի անդամների հետ հետևել է գործի զարգացումներին և քայլեր ձեռնարկել նրան ազատ արձակելու նպատակով, սակայն դրանք դրական արդյունքի չեն հանգեցրել: Նա անընդունելի է համարել այն, որ Իսրայելի քաղաքացին ձերբակալվում է և բանտարկվում է միայն նրա համար, որ կատարել է անմեղ ճանապարհորդություն և գրառում բլոգում:

«Ինձ համար հատկապես անտանելի է մեր երկրի ղեկավար օղակների լռությունը»,- ասել է Սվետլովան` ուշագրավ համարելով այն փաստը, որ Ալեքսանդր Լապշինը Մինսկում ձերբակալվել է նույն օրերին, ինչ Նեթանյահուն այցելել է Բաքու: Բացի այդ, նա հիշեցրել է, որ Իսրայելը միլիարդավոր դոլարներով զենքի առևտուր է անում Ադրբեջանի հետ:

Պատգամավորը հայտնել է, որ երկու շաբաթ առաջ Լապշինի գործով դիմել է Նեթանյահուին, սակայն չի ստացել որևէ պատասխան: «Այսօր ես կրկին կոչ եմ անում վարչապետին և պաշտպանության նախարարին, ովքեր սերտ կապեր ունեն Ադրբեջանի հետ, միջամտել հանուն անմեղ քաղաքացու իրավունքների, քանի դեռ որևէ դժբախտություն տեղի չի ունեցել: Ալեքսանդր Լապշինը պետք է անհապաղ ազատ արձակվի»,- եզրափակել է Սվետլովան:

Բելառուսի Գերագույն դատարանը փետրվարի 7-ին մերժել է Ռուսաստանի և Իսրայելի քաղաքացի, բլոգեր Ալեքսանդր Լապշինի բողոքը՝ կապված Բելառուսի Գլխավոր դատախազության որոշման հետ, որով Լապշինը պետք է արտահանձնվի Ադրբեջան:

Լապշինը նույն օրը հատուկ չվերթով տեղափոխվել է Մինսկից Բաքու ` պետական անվտանգության ծառայության աշխատակիցների ուղեկցությամբ:

Ադրբեջանում ՌԴ և Իսրայելի քաղաքացի բլոգերին սպառնում է քրեական հետապնդում 281.2 (երկրի դեմ ուղղված հրապարակային կոչեր) և 318 (Ադրբեջանի Հանրապետության պետական սահմանի անօրինական հատում) հոդվածներով: Երկու հոդվածներով Լապշինին սպառնում է մինչև 5 տարվա ազատազրկում:


Բաժանորդագրվեք մեր ալիքին Telegram-ում






youtube

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am