«Վեթինգ» պետք է կիրառվի և՛ նախորդ, և՛ ներկա նախարարների նկատմամբ. Արայիկ Հարությունյան
1 րոպեի ընթերցում
ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: ՀՀ կրթության և գիտության նախարար Արայիկ Հարությունյանը գտնում է, որ բացի դատավորներից, «վեթինգ» պետք է կիրառվի և՛ նախորդ, և՛ ներկա նախարարների նկատմամբ: Այդ մասին Հարությունյանը նշեց կառավարության նիստից հետո լրագրողների հետ զրույցում:
«2-3 տարի առաջ այն ժամանակ պատգամավոր Նիկոլ Փաշինյանը խոսեց, որ պետք է յուրաքանչյուրի պաշտոնյա եղած ժամանակ ձեռքբերվածը ստուգվի: Ես այդ տարբերակին էլ դեմ չեմ»,- «Արմենպրես»-ի փոխանցմամբ, նշեց նախարարը:
Նրա կարծիքով՝ դատավորների նկատմամբ «վեթինգի» կիրառումը կարող է իսկապես զտել, մաքրել դատաիրավական համակարգը:
«Հիմա տեսնում եք՝ մամուլում հրապարակվում են բազմաթիվ նյութեր, որտեղ հստակ երևում է, որ X դատավորն ինչ-որ մի ժամկետում հանկարծ մի քանի տասնյակ միլիոնի նվիրատվություն է ստանում, կարողանում է փոխառություններ տալ, գույքի քանակն է ավելանում: Պետք է հասկանալ՝ որտեղի՞ց դա: Ուղղակի խնդիրն այն է, որ համատարած անվստահություն կա համակարգի նկատմամբ: Դատավորները, ովքեր արդար են, ազնիվ են և իրենց քրտինքով են այդ գույքը վաստակել, պետք է խնդիր չունենան»,- նշեց Արայիկ Հարությունյանը: