Վիգեն Սարգսյանը Հայաստանում կատարվածը հեղափոխություն չի համարում

ԵՐԵՎԱՆ, 9 ՄԱՅԻՍԻ, ԱՐՄԵՆՊՐԵՍ: ՀՀ պաշտպանության նախարարի պաշտոնակատար Վիգեն Սարգսյանը վերջին օրերի Հայաստանում կատարվածը հեղափոխություն չի համարում: Նա այս մասին նշեց լրագրողների հետ հանդիպմանը:

«Ինչու չեմ համարում, որովհետև հեղափոխությունը պետաիրավական համակարգի փոփոխություն է, իսկ մեզ մոտ տեղի է ունեցել իշխանափոխություն, խորհրդարանական մի խմբակցության ներկայացուցիչը վարչապետի պաշտոնում փոխարինել է մեկ այլ խմբակցության ներկայացուցչի: Այն եզրույթը, որ օգտագործվում է՝ փոքրամասնության կառավարություն, սխալ է: Դա հնարավոր է, երբ խորհրդարանում ոչ ոք չունի մեծամասնություն, և փոքրամասնության խմբակցություններից մեկն իր վրա վերցնում է պատասխանատվություն կոորդինացնելու այլ խմբակցությունների հետ յուրաքանչյուր որոշման շուրջ կոնսենսուս ձեռք բերելը: Այն, ինչ ունենք հիմա, իրավական առումով անհասկանալի մոդել է: Մենք ունենք խորհրդարանական մեծամասնություն, դրա հետ մեկտեղ փոքրամասնություն ներկայացնող վարչապետ, որը վտանգներով լի է»,-«Արմենպրես»-ի հաղորդմամբ՝ ասաց Վիգեն Սարգսյանը:

Նրա խոսքով, ամեն անգամ, երբ մեծամասնության որոշումը ձեռք չտա փոքրամասնության վարչապետին և կառավարությանը, ապա նրանք պետք է մարդիկ դուրս բերեն փողոց և ճնշում գործադրեն պատգամավորների վրա, որպեսզի իրենց կամքին դեմ քվեարկեն: Ըստ նրա՝ դա ամեն ինչ է, բացի ժողովրդավարությունից և վտանգներով լի ձև է:

«Ինչու, որովհետև գտնվելու է մարդ, ով ավելի շատ մարդ կարող է փողոց դուրս բերել այլ իրավիճակում, այլ ժամանակներում և մենք շատ արագ կարող ենք հայտնվել տարօրինակ վիճակում: Լինում են ծայրահեղ իրավիճակներ, երբ խորհրդարանը չի արտացոլում իրական պատկերը: Կարող է մի քիչ էքստրեմալ հնչել, բայց այդ դեպքում, իմ պատկերացմամբ, նախընտրելի է ազնվորեն ասել, որ խորհրդարանը չի ներկայացնում ոչինչ, հռչակվել դիկտատոր և որոշումներ կայացնել հրապարակում: Հարցնել ժողովրդին, թե ինչպես կքվեարկի այս կամ այն հարցում, և ինչպես քվեարկի ժողովուրդը այդպես էլ օրենքներ, հրամանագրեր ընդունել, մինչև ձևավորվի նոր խորհրդարան»,-ասաց Վիգեն Սարգսյանը: Նրա խոսքով, այդպիսի փորձ աշխարհում շատ է եղել և այն աշխատել է:

Անդրադառնալով այն թիմի պատասխանատվությանը, որի անդամ է նաև Վիգեն Սարգսյանը՝ նա նշեց, որ այն շատ մեծ է: «Սրված իրավիճակ էր, վիրաբուժական միջամտություն է եղել, պետք է սպասել, վիճակը հանդարտվի, կայունանա, բոլոր բնականոն ռիթմերը վերականգնվեն, որից հետո պետք է բուժել խրոնիկ հիվանդությունները, պատճառները, որոնք ծնել են այս իրավիճակը»,-հավելեց նա:

Մարտի 31-ին ԱԺ պատգամավոր, «Քաղաքացիական պայմանագիր» կուսակցության վարչության անդամ Նիկոլ Փաշինյանը սկսեց իր «Քայլ արա» ակցիան Գյումրու Վարդանանց հրապարակից: Ապրիլի 13-ին Նիկոլ Փաշինյանի գլխավորած քայլարշավը հասավ Երևան, նրանք փակեցին Ֆրանսիայի հրապարակն ու գիշերեցին այնտեղ: Հաջորդ օրերին շարունակվեցին քայլերթերը Երևանում: Ապրիլի 17-ին Նիկոլ Փաշինյանը հայտարարեց առանց բռնության, բաց ձեռքերով «թավշյա հեղափոխության» մեկնարկի մասին: Սկսվեցին զանգվածային անհնազանդության գործողությունները Երևանի տարբեր հատվածներում: Ապրիլի 23-ին հրաժարական տվեց ապրիլի 17-ին Ազգային ժողովի կողմից վարչապետ ընտրված Սերժ Սարգսյանը:

Մայիսի 1-ին Ազգային ժողովում անցկացվեց ՀՀ վարչապետի ընտրություն, «Ելք» խմբակցության կողմից վարչապետի թեկնածու էր առաջադրվեց Նիկոլ Փաշինյանը: Խորհրդարանը, սակայն, ձախողեց վարչապետի ընտրությունը՝ 56 դեմ և 45 կողմ քվեարկությամբ: Նիկոլ Փաշինյանը մայիսի 2-ը հայտարարեց «տոտալ գործադուլի» օր, փակվեցին մայրաքաղաքի մի շարք մեծ ու փոքր փողոցները, Երևան եկող մայրուղիները, այդ թվում՝ օդանավակայանի խաչմերուկը:

Նույն օրը ՀՀԿ-ն հայտարարեց, որ մայիսի 8-ին կայանալիք վարչապետի ընտրություններին կպաշտպանի պատգամավորների մեկ երրորդի (35 պատգամավոր) կողմից առաջադրված թեկնածուին, և այդ օրը ՀՀ-ն կունենա վարչապետ: Միաժամանակ «Ծառուկյան», ՀՅԴ խմբակցությունները հայտարարեցին, որ կպաշտպանեն ժողովրդի թեկնածուին: Նիկոլ Փաշինյանը Հանրապետության հրապարակում հավաքված ժողովրդին ասաց, որ ժողովրդի թեկնածուն ինքն է, ու մայիսի 3-ին նրա թեկնածությունն առաջադրվեց ԱԺ-ում:

ՀՀ վարչապետի ընտրության երկրորդ փուլը տեղի ունեցավ մայիսի 8-ինԱզգային ժողովի հատուկ նիստում: Փաշինյանը ՀՀ վարչապետ ընտրվեց 59 կողմ, 42 դեմ ձայներով: