3 րոպեի ընթերցում
ԵՐԵՎԱՆ, 9 ԱՊՐԻԼԻ, ԱՐՄԵՆՊՐԵՍ: Սան Ֆրանցիսկոյում ապրիլի 7-ին և 8-ին տեղի ունեցան Pro Chess League ակումբային մրցաշարի կիսաեզրափակիչները և եզրափակիչը, որտեղ հաղթող դարձավ «Հայկական արծիվներ» թիմը:
«Արմենպրես»-ի հաղորդմամբ` այս մասին հայտնում է շախմատի ֆեդերացիան: Հայկական արծիվներ թիմը (Armenia Eagles) դարձել էր Արևելյան ենթախմբի հաղթող և իրավունք ստացել վիճարկելու մրցաշարի հաղթողի կոչումը:
Թիմի կազմում Սան Ֆրանցիսկո էին մեկնել ՄԳ Զավեն Անդրիասյանը (1-ին խաղատախտակ), ՄԳ Սամվել Տեր-Սահակյանը (2-րդ խաղատախտակ), ՄԳ Կարեն Գրիգորյանը (3-րդ խաղատախտակ) և ազգային վարպետ Արտակ Մանուկյանը (4-րդ խաղատախտակ): Pro Chess League –ի կանոնների համաձայն՝ թիմի 4 խաղացողների միջին գործակիցը չպետք է գերազանցի 2500 կետը: Թիմի կազմում մրցաշրջանի ընթացքում բացի վերը նշված մասնակիցներից հանդես են եկել և ընդհանուր հաղթանակին մեծապես նպաստել են Հրանտ Մելքումյանը և Մանուէլ Պետրոսյանը:
Կիսաեզրափակչում մեր թիմի մրցակիցն էր Pro Chess League գործող չեմպիոն Սենթ Լուիսի ակումբը, որի կազմում մշտապես հանդես է գալիս Ֆաբիանո Կարուանան, սակայն վճռորոշ այս փուլում նա բացակայում էր GRENKE Chess Classic մրցաշարի մասնակցության պատճառով: Կարուանայի բացակայության պայմաններում թիմը գլխավորում էր ԱՄՆ ներկայացնող մեր հայրենակից Վարուժան Հակոբյանը: Բացի Հակոբյանից թիմի կազմում հանդես էին գալիս գրոսմայստերներ Դարիուշ Սվերչը, Յարոսլավ Ժերեբուխը և ազգային վարպետ Ֆորեստ Չենը: Կիսաեզրափակիչն անցավ լարված և հավասար պայքարում: 7.5 - 7.5 հաշվի ժամանակ մեր թիմին հաղթական միավորը բերեց Սամվել Տեր-Սահակյանը:
Երկրորդ կիսաեզրափակչում Չինաստանը ներկայացնող Chengdu Pandas ակումբը հեշտորեն հաղթանակ տոնեց Ljubljana Turtlesթիմի նկատմամբ: Չինաստանը ներկայացնող թիմի կազմում հանդես էին գալիս Օլիմպիական չեմպիոններ Վան Յուն և Նի Հուան, ինչպես նաև պատանի գրոսմայստեր Սյու Սյանյուն և պատանի շախմատիստուհի Չուո Ռուտոնը:
Հայկական արծիվներ (Armenia Eagles) թիմը դարձավ Pro Chess League ակումբային մրցաշարի հաղթող:
Ակումբային այս մրցաշարին մասնակցում էին աշխարհի չեմպիոն Մագնուս Կարլսենը, հավակնորդ Ֆաբիանո Կարուանան, աշխարհի նախկին չեմպիոն Վիշվանաթան Անանդը, հանրահայտ շախմատիստներ Մաքսիմ Վաշիե-Լագրավը, Հիկարու Նակամուրան, Էթիեն Բաքրոն, Պենտալա Հարիկրիշնան, Վիդիթ Գուջրաթին, Դմիտրի Անդրեյկինը և այլն: