Մեր հաջորդ նպատակը Երևանում կայանալիք մարմնամարզության Եվրոպայի առաջնությունն է. Մամիկոն Խաչատրյան

Հայաստանի սպորտային մարմնամարզության հավաքականի անդամ, աշխարհի առաջնության արծաթե ու բրոնզե մեդալակիր Մամիկոն Խաչատրյանը Նիդեռլանդների Ռոտերդամ քաղաքում կայացած մարմնամարզության ԱԱ-ից հետո կարևորում է Երևանում 2027 թվականին կայանալիք Եվրոպայի առաջնությունը:

«Մարմնամարզիկ Համլետ Մանուկյանի հետ շատ էինք սպասել, որ աշխարհի առաջնությունում դառնանք մեդալակիր ու չեմպիոն, բարձրանանք պատվո հարթակին ու բարձրացնենք Հայաստանի դրոշը: Այս ամենն աննկարագրելի պահ է: Բնականաբար, եզրափակչում լարվածությունը շատ էր ու ամեն մի չնչին սխալը կարող էր զրկել մեզ մեդալից: Մենք շեշտը դրել էինք մեր վարժությունները լավ կատարելու վրա: Մեր հաջորդ նպատակը Երևանում կայանալիք մարմնամարզության Եվրոպայի առաջնությունն է, որտեղ ցանկանում եմ մեր ուժերի առավելությունը ներդնենք ու ուրախացնենք մեր ազգին»,-«Արմենպրես»-ի հաղորդմամբ` լրագրողների հետ զրույցում ասաց Մամիկոն Խաչատրյանը:

Նիդեռլանդների Ռոտերդամ քաղաքում կայացած սպորտային մարմնամարզության աշխարհի առաջնությունում Հայաստանի հավաքականից աշխարհի չեմպիոն դարձան Արթուր Դավթյանը (հենացատկ), Համլետ Մանուկյանը (նժույգ-թափեր), իսկ Արթուր Ավետիսյանը (օղակներ) ու Մամիկոն Խաչատրյանը (նժույգ-թափեր) նվաճեցին բրոնզե մեդալներ: