1 րոպեի ընթերցում
ԵՐԵՎԱՆ, 20 ՄԱՐՏԻ, ԱՐՄԵՆՊՐԵՍ: Լիբիայի նախկին ղեկավար Մուամար Քադաֆիի որդին՝ Սեյֆ ալ Իսլամը, իր թեկնածությունն Է առաջադրել երկրի նախագահի պաշտոնի համար: Ինչպես մարտի 19-ին հայտնել Է Al Arabiya հեռուստաալիքը, Թունիսում կայացած մամուլի ասուլիսում այս մասին հայտարարել Է նրա ներկայացուցիչ Այման Բուրասը, տեղեկացնում Է «Արմենպրես»-ը:
Հեռուստաալիքի տեղեկատվությամբ՝ Բուրասը հավելել Է, որ Սեյֆ ալ Իսլամի նպատակը «երկիրը փրկելն Է, անձնական ու ընդհանուր ազատությունները պաշտպանելը եւ ահաբեկչության լիակատար ոչնչացումը պետության տարածքում»: Բուրասի խոսքով՝ շուտով նախագահության թեկնածուն կդիմի ընտրողներին եւ ավելի հանգամանորեն կպատմի իր նախընտրական արշավի մասին:
44-ամյա Սեյֆ ալ Իսլամը՝ Մուամար Քադաֆիի ավագ որդին երկրորդ ամուսնությունից, հոր կողմից դիտվում Էր որպես հավանական ժառանգորդ: Նա կրթությամբ ճարտարապետ Է եւ ինժեներ, ուսանել Է Ավստրիայում եւ Մեծ Բրիտանիայում: Ավարտել Է Լոնդոնի տնտեսագիտության եւ քաղաքական գիտությունների դպրոցը, որտեղ նրան շնորհվել Է փիլիսոփայության դոկտորի աստիճան, հաղորդել Է ՏԱՍՍ-ը: