1 րոպեի ընթերցում
ԳԱՎԱՌ, 22 ԴԵԿՏԵՄԲԵՐԻ, ԱՐՄԵՆՊՐԵՍ: Գեղարքունիքի մարզի Շողակաթ խոշորացված համայնքում արդեն լուծվել է բնակավայրերի միջեւ առկա տրանսպորտային հաղորդակցության խնդիրը: Ինչպես «Արմենպրես»-ին տեղեկացրեց Շողակաթ համայնքի ղեկավար Սուլիկո Շուշանյանը, համայնքի միջոցներով ձեռք է բերվել «Գազել» մակնիշի մեքենա, որը կապահովի տրանսպորտային հաղորդակցությունը համայնքի կազմում ընդգրկված Դրախտիկ, Աղբերք, Շողակաթ, Արտանիշ, Ջիլ եւ Ծափաթաղ բնակավայրերի միջեւ:
Միաժամանակ Ջիլ-Երեւան ուղեւորատար միկրոավտոբուսը ուղեւորափոխադրումներ կիրականացնի արդեն Ծափաթաղ-Երեւան երթուղով: «Շողակաթի կազմում ընդգրկված բնակավայրերում, որոնք իրարից գտնվում են մի քանի տասնյակ կիլոմետր հեռավորությամբ, շատ հրատապ էր ներհամայնքային տրանսպորտային կապի ապահովումը, ինչը եւ կարգավորել ենք:
Հաշվի առնելով այն հանգամանքը, որ Ծափաթաղ գյուղն էլ է ընդգրկված մեր համայնքի կազմում, նպատակահարմար գտանք առաջարկել երթուղին սպասարկող ընկերությանը՝ Ջիլ-Երեւան երթուղու մեջ ընդգրկել նաեւ Ծափաթաղը, որը Ջիլից դեպի արեւելք հեռու է մոտ 10 կիլոմետրով եւ համարվում է մարզի տուրիստական կարեւոր հանգրվաններից մեկը»,-հավաստեց համայնքի ղեկավարը: