1 րոպեի ընթերցում
ԵՐԵՎԱՆ, 21 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի և Վրաստանի գրողների միություններն ակտիվորեն համագործակցում են: «Արմենպրես»-ի հաղորդմամբ՝ դեկտեմբերի 21-ին լրագրողների հետ զրույցում այս մասին ասաց Հայաստանի գրողների միության նախագահ Էդվարդ Միլիտոնյանը:
«Ինչպես ամեն տարի, այս տարի ևս Սայաթ Նովային նվիրված «Վարդատոն»-ը անցկացվել է Վրաստանում վրացի գրողների հետ: Սա մեր երկու պետությունների տուրքն է մեծ գրողին, ինչպես նաև հայ և վրացի բարեկամության մեծ տոն»,-ասաց Գրողների միության նախագահը:
Վրաստանի գրողների միության հետ նաև ամեն տարի Գանձայում նշում են Վահան Տերյանի ծննդյան օրը: Հովհաննես Թումանյանի տուն-թանգարանի բացումով ևս նոր աշխատանքների սկիզբ դրվեց: «Հայ և վրացի գրողներով այնտեղ պլանավորում ենք հանդիպումներ, քննարկումներ: Այն լինելու է թանգարան-ինստիտուտ, հանդիպումների վայր, ինչպես եղել է Թումանյանի կենդանության օրոք»,-եզրափակեց Միլիտոնյանը: