Ռուսաստանցի փորձագետը անհնարին է համարում ղարաբաղյան հակամարտության լուծումը ռազմական ճանապարհով
1 րոպեի ընթերցում
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Ապրիլյան պատերազմից հետո առավել ակնհայտ դարձավ, որ ղարաբաղյան հակամարտությունն ուժով լուծել հնարավոր չէ: «Արմենպրես»-ի հաղորդմամբ՝ լրագրողների հետ զրույցում նման կարծիք հայտնեց ՌԴ գիտությունների ակադեմիայի արեւելագիտության ինստիտուտի Կենտրոնական Ասիայի եւ Կովկասի հետազոտությունների կենտրոնի փորձագետ Անդրեյ Արեշեւը:
«Եվ դա պետք է ակնհայտ լինի նաեւ բոլոր նրանց համար, ովքեր բարձրաձայն հայտարարում են, որ դեռեւս այդ ճանապարհը կա: Մեկ անգամ չէ, որ միջնորդները նշել են, չի կարող լինել ուժային լուծում: Փորձագետները, այդ թվում՝ նաեւ Ռուսաստանի, նշում են, որ ի տարբերություն հետխորհրդային տարածքում այլ հակամարտությունների՝ սա այն դեպքն է, երբ Ռուսաստանը, ԱՄՆ-ն եւ Եվրոպան՝ ի դեմս Ֆրանսիայի, աշխատում են քիչ թե շատ համակարգված»,-ասաց փորձագետը:
Նրա խոսքով՝ Հայաստանը բազմիցս հայտարարել է, որ պատրաստ է իր բաժին ճանապարհն անցնել, սակայն ցանկացած փոխզիջումային որոշման կարելի է հասնել միայն բոլոր կողմերի բարի կամքի դրսեւորման դեպքում:
Անդրեյ Արեշեւն ընդգծեց, որ սահմանում տեղի ունեցող ոչ մի ռազմական գործողություն չպետք է մնա անպատասխան: