Տարազը որպես մշակույթի բաղադրիչ. Հյուսիսային պողոտայում անցկացվեց «Երևան Տարազ ֆեստ» առաջին փառատոնը
4 րոպեի ընթերցում
ԵՐԵՎԱՆ, 5 ՕԳՈՍՏՈՍԻ, ԱՐՄԵՆՊՐԵՍ:Դասական և ժամանակակից տարազները` մեկ հարթակում. Հյուսիսային պողոտայում օգոստոսի 5-ին անցկացվեց «Երևան Տարազ ֆեստ» միջոցառումը, որի մասնակիցները հանրությանը ներկայացրին ավանդական տարազներ, ինչպես նաև տարազային տարրեր պարունակող ժամանակակից հագուստ: «Երևան Տարազ ֆեստ» առաջին փառատոնը կազմակերպել էին Երևանի քաղաքապետարանը և «Տերյան» մշակութային կենտրոնը:
Երևանի քաղաքապետարանի մշակույթի և տուրիզմի վարչության տուրիզմի բաժնի պետ Մարիա Բարաղամյանընշեց, որ փառատոնն անցկացվում է «Երևանյան ամառ» եռամսյա ծրագրի շրջանակում:
«Փառատոնն իրականացնելու գաղափարը «Տերյան» մշակութային կենտրոնինն է, ով առաջարկել է նման բան կազմակերպել: Տարազը տվյալ մշակույթի բաղադրիչ մասն է, հնարավորություն է տալիս կարծիք կազմել ժողովրդի անցած ճանապարհի, մշակույթի մասին: Տարազն իր մեջ մի ամբողջ ժողովրդի պատմությունն է ամփոփում»,-«Արմենպրես»-ի փոխանցմամբ` նշեց Մարիա Բարաղամյանը` փաստելով, որ փառատոնին մասնակցում են նաև զբոսաշրջիկներ, ինչը ոչ պակաս կարևոր և ուրախալի է:
Նա հավելեց, որ իրադարձությանը ներկայացված են ոչ միայն տարազներ, այլև տարազների բաղադրիչ ներառող հագուստներ, որոնք դուր կգան հատկապես երիտասարդներին:
«Տերյան» մշակութային կենտրոնի տնօրեն Լիլիթ Մելիքյանը նշեց, որ երկու տարի առաջ ցանկություն են ունեցել նման փառատոն կազմակերպել:
«Անցյալ տարի քաղաքապետարանին ներկայացրինք ծրագիր` նման փառատոն կազմակերպելու համար: Մենք ցանկություն ունեինք նաև ներկայացնել այլ ազգային փոքրամասնությունների տարազները, հուսանք հաջորդ անգամ կհաջողվի նման բան էլ անել»,-նշեց Լիլիթ Մելիքյանը:
Երևանի պատմության թանգարանի տնօրեն Արմինե Սարգսյանը նշեց, որ տարազների փառատոնը մշակութային մեծ աշխուժություն է մտցնելու երևանցիների և հյուրերի կյանքում: «Այս փառատոնի նպատակն է ներկայացնել մեր ազգային մշակույթը: Կարծում եմ, որ փառատոնը մշտական կդառնա և կհավակնի երևանյան մշակութային կյանքում ունենալ իր տեղը»,-ընդգծեց Արմինե Սարգսյանը` հավելելով, որ թանգարանը փառատոնին ներկայացել է պատմական Հայաստանի տարբեր շրջանները ներկայացնող տարազների կրկնօրինակներով` այդ թվում նաև երևանցու ավանդական տարազով:
Հյուսիսային պողոտայում տեղակայված տաղավարներում, փառատոնի խորհրդին համահունչ, ներկայացվեցին Երևանի պատմության թանգարանի, Մեգերյան կարպետ-թանգարանի ցուցանմուշները, Անահիտ Սիմոնյան նորաձևության տան, ինչպես նաև մի շարք անհատ ստեղծագործողների աշխատանքները: «Մարաշլեան» ֆոտո ատելիեում էլ բոլոր ցանկացողները լուսանկարվելու հնարավորություն ունեցան: «Երևան Տարազ ֆեստ»-ի համերգային ծրագրին մասնակցեցին մի շարք ազգագրական համույթներ: Փառատոնի շրջանակում անցկացվեց հագուստների ցուցադրություն, որի ընթացքում ներկայացվեցին «Տերյան» մշակույթի կենտրոնի և դիզայներ Արամ Նիկոլյանի տարազների հավաքածուները: