2 րոպեի ընթերցում
ԵՐԵՎԱՆ, 26 ՄԱՅԻՍԻ, ԱՐՄԵՆՊՐԵՍ: Առողջապահության համաշխարհային կազմակերպությունը մայիսի 18-ից ի վեր Արեւմտյան Աֆրիկայում գրանցել է Էբոլա վիրուսի հարուցած հիվանդությունից մահվան 15 դեպք եւ վարակման 17 նոր դեպք: Այդ մասին, ինչպես տեղեկացնում է «Արմենպրես»-ը, վկայում են Ժնեւում տարածված վիճակագրական տվյալները:
Ընդամենը համաճարակի սկսվելուց հետո Գվինեայում, Լիբերիայում եւ Սիեռա Լեոնեում վտանգավոր հիվանդությունից մահացել է 11 հազար 132 մարդ, վարակվել է 27 հազար 2 բնակիչ: Լիբերիայում զոհերի թիվը 4 հազար 806 է, վարակվածներինը՝ 10 հազար 666: Մայիսի 9-ից այդ երկիրը պաշտոնապես ազատ է հայտարարված Էբոլայից: Սակայն վիրուսն առայժմ հաղթահարված չէ Սիեռա Լեոնեում եւ Գվինեայում: Սիեռա Լեոնեում համաճարակի ընթացքում մահացել է 3 հազար 900 մարդ, վարակվածների թիվը հասնում է 12 հազար 696-ի: Գվիենայում վարակվածներն եւ մահացածներն զգալիորեն քիչ են՝ համապատասխանաբար 3 հազար 640 եւ 2 հազար 418:
Հիվանդանալու դեպքեր են գրանցվել նաեւ Մալիում, Նիգերիայում, Սենեգալում, Իսպանիայում, Մեծ Բրիտանիայում եւ ԱՄՆ-ում: Այդուհանդերձ, այդ երկրների մեծ մասում վարակվածների թիվը չի գերազանցում տասը: Բացառություն է կազմում միայն Նիգերիան, որտեղ վարակվել է քսան մարդ, ութը մահացել են:
Մայիսի կեսի դրությամբ հաղորդվել էր, որ Արեւմտյան Աֆրիկայում Էբոլայով հիվանդացությունն ընկել է տարեսկզբից ի վեր ամենացածր մակարդակ, հաղորդել է ՏԱՍՍ-ը: