2 րոպեի ընթերցում
ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: Սիրիայի Հոմսի մարզի հյուսիսում գտնվող Ալ Վաեր գյուղում ուժի մեջ է մտել 10-օրյա զինադադարը սիրիական ուժերի և զինված ընդդիմադիրների միջև: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, զինադադարի հաջող պահպանման դեպքում կողմերը համաձայնության կգան կրակի դադարեցման մասին, որի արդյունքում զինյալները կհեռանան Ալ Վաեր շրջանից:
Հոմսի հին շրջաններից զինյալները հեռացել դեռ 2014թ.-ի մայիսին, սակայն նրանց հաջողվել էր պահպանել հենակետը Ալ Վաեր գյուղում, ինչպես նաև դրա հարևանությամբ գտնվող մի քանի տարածքներում: Սիրիական բանակը ռազմական գործողություններ չէր ծավալել այնտեղ, քանի որ փախաստականների մեծ մասը բնակություն էր հաստատել գյուղում:
Լուրեր են շրջանառվում, որ Ալ Վաերի ազատագրումից հետո հնարավոր է ազատագրվեն նաև ընդդիմադիրների հսկողության տակ գտնվող Դար ալ Կաբիրա և Հուլան բնակավայրերը:
Ալ Վաեր գյուղաքաղաք է մտել առաջին մարդասիրական օգնությունը:
Դամասկոսի հարավում գտնվող Բեյթ Սահեմ գյուղից հեռացել են «Ջաբհա ան Նուսրա» ահաբեկչական խմբավորման անդամները, ինչը հնարվորություն է տվել վերահաստատել կրակի դադարեցման ռեժիմը մայրաքաղաքի հարավային հատվածներում: Շրջանին տրամադրվել է մարդասիրական օգնություն մթերքների և դեղամիջոցների տեսքով:
Մարդասիրական օգնություն է տրամադրվել նաև Դամասկոսում գտնվող «Յարմուք» պաղեստինցի փախստականների ճամբարին: Ճամբարը դարձել է փախստականներին ընդունող վայր, որտեղ բնակություն են հաստատել Դամասկոսի ծայրամասերի բնակիչները:
Սիրիայում մոտ 4 տարի շարունակվող բախումների հետևանքով, ՄԱԿ-ի տվյալներով, զոհերի թիվը մոտեցել է 200 հազարի: