2 րոպեի ընթերցում
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: «Ալ Կաիդա»-ի հետ կապված «Ջաբհա ան Նուսրա» խմբավորումը Սիրիայում կառավարական ուժերի հետ թեժ բախումներից հետո հսկողություն է հաստատել շիական Զահրա գյուղի մերձակա տարածքի վրա, որը գտնվում է Հալեպի մերձակայքում: Ինչպես հաղորդում է«Արմենպրես»-ը՝ վկայակոչելով արաբական լրատվամիջոցները, այս մասին հայտարարել է Մարդու իրավունքների պաշտպանության սիրիական մոնիթորինգի կենտրոնը՝ ավելացնելով, որ ահաբեկչական խմբավորումը փորձում հսկողություն հաստատել Զահայի վրա: Գյուղերը զինյալների համար կարևոր նշանակություն ունեն, քանի որ հսկողություն հաստատելու դեպքում Թուրքիայի նրանց խմբակիցները հեշտությամբ կարող են տարածվել Հալեպում:
Թեժ բախումներ են ընթացել Հալեպի Զահրա և Նաբլ գյուղերի շրջակայքում: Բախումները սկսվել են նոյեմբերի 23-ի գիշերը: Ըստ տեղեկությունների՝ երկու կողմերը վնասներ են կրել, սպանվածների մեջ 8 ահաբեկիչներ կան: Սիրիական ուժերին օգնում են ռազմաօդային ուժերը:
Սա առաջին դեպքը չէ, երբ զինյալները հարձակում են գործում Նաբլ և Զահրա գյուղերի վրա, սակայն առաջին անգամն է, երբ նրանք հաջողություն են գրանցում:
Ավելի վաղ՝ մարտին, ՄԱԿ-ը հայտարարել էր, որ զինյալները շրջափակման մեջ են պահում 2 գյուղերը, որոնց բնակչությունը մոտ 45 հազար է: Գյուղերը հոսանքազրկվել էին և ջրամատակարարումը դադարեցվել էր:
Սիրիական հակամարտության ավելի քան 3,5 տարիների ընթացքում զոհվել է մոտ 200 հազար մարդ, միլիոնավոր սիրիացիներ ստիպված լքել են հայրենիքը՝ հաստատվելով հիմնականում հարևան Լիբանանում, Թուրքիայում, Իրաքում և Հորդանանում: