Ճապոնիան ակտիվորեն կնպաստի Աֆրիկայի՝ որպես համաշխարհային աճի շարժիչներից մեկի, զարգացմանը

ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ: Աֆրիկան դառնում է գլոբալ տնտեսական աճի նոր կենտրոն, եւ Ճապոնիան մտադիր է ակտիվորեն աջակցել նրա զարգացմանը, մասնավորապես, մայրցամաքի ենթակառուցվածքում եւ էներգետիկայում ներդրումներ կատարելու ճանապարհով: Այդ մասին, ինչպես տեղեկացնում է «Արմենպրես»-ը, ասված է ամփոփիչ Հռչակագրում եւ 2013-2017 թվականներին Գործողությունների ծրագրում, որոնք հունիսի 3-ին ընդունվել են Աֆրիկայի զարգացմանը նվիրված Տոկիոյի հինգերորդ միջազգային խորհրդաժողովի արդյունքում: Այն հունիսի 1-ից ընթանում էր Ճապոնիայի մայրաքաղաքի մերձակա Իոկոգամա քաղաքում մայրցամաքի շուրջ հիսուն երկրների ղեկավարների ու ներկայացուցիչների մասնակցությամբ:

Ճապոնիան խորհրդաժողովում հայտարարել է, որ 3,2 տրիլիոն իեն (մոտավորապես 32 մլրդ դոլար) կտրամադրի մայրցամաքում զարգացման տարբեր մասնավոր ու պետական նախագծերի իրացման համար:

Ճապոնիան Աֆրիկայում մտադիր է մրցակցել Չինաստանի հետ, որն էականորեն ուժեղացնում է իր ներկայությունը մայրցամաքում՝ այնտեղ զբաղվելով խոշոր ենթակառուցվածքային նախագծերով եւ օգտական հանածոների արդյունահանմամբ: Ներկայում Աֆրիկայի երկրների հետ ՉԺՀ-ի առեւտրի ծավալը 5,5 անգամ ավելի է, քան Ճապոնիայի հետ նրանց ներմուծման-արտահանման գործառնությունների գումարը: