1 րոպեի ընթերցում
ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: Մամուլի ազատության միջազգային օրվա կապակցությամբ «Լրագրողներ առանց սահմանների» միջազգային կազմակերպությունը հրապարակել է իր ավանդական «Մամուլի գիշատիչներ» ցուցակը: Ցուցակում ներառված են 39 պետության ղեկավարներ, քաղաքական, կրոնական, ռազմական գործիչներ: Ինչպես հաղորդում է «Արմենպրես»-ը` վկայակոչելով ադրբեջանական Contact.az-ը, «Մամուլի գիշատիչներ»-ի ցուցակում է հայտնվել նաև Ադրբեջանի նախագահ Իլհամ Ալիևը և Նախիջևանի ղեկավար Վասըֆ Թալիբովը:
«Մամուլի գիշատիչներն ավելի ու ավելի ակտիվ են դարձել: 2012 թվականին աշխարհում մամուլի դեմ բռնությունները հասել են աննախադեպ աստիճանի, սպանվել են ռեկորդային թվով լրագրողներ»,- ասվում է «Լրագրողներ առանց սահմանների» հրապարակած զեկույցում:
«Մամուլի գիշատիչներ»-ի ցուցակում ներառված են անձիք, ովքեր կապված են լրագրողների և մամուլի այլ աշխատակիցների սպանությունների, առևանգման, հետապնդումների, խոշտանգումների և ճնշումների հետ: Բոլոր «գիշատիչների» ընդհանուր գիծ է նշվում նրանց ինքնավստահությունն ու համոզվածությունն այն բանում, որ իրենք օրենքից վեր են: