1 րոպեի ընթերցում
ԵՐԵՎԱՆ, 19 ԱՊՐԻԼԻ, ԱՐՄԵՆՊՐԵՍ: Հռոմի Ֆրանցիսկոս պապն իր գահակալության պաշտոնական արարողությունից հետո ուղերձ է հղել Մեծի Տանն Կիլիկիո Արամ Ա կաթողիկոսին: Ինչպես հաղորդում է «Արմենպրես»-ը` վկայակոչելով Կիլիկիո կաթողիկոսության ֆեյսբուքյան պաշտոնական էջը, ուղերձում նա սրտանց երախտագիտությունն է հայտնել Վեհափառ Հայրապետին ցուցաբերած սրտակցության եւ սիրո համար, որն արտահայտվել է Վատիկանում գահակալության առիթով պատվիրակության ներկայությամբ:«Խորապես զգացված եմ այս եղբայրական վերաբերմունքից, որն ինձ համար հոգեկան գոհունակության եւ քաջալերանքի աղբյուր է»,- նշել է Ֆրանցիսկոս պապը:
Ապա Սրբազան քահանայապետն ավելացրել է. «Որպես հավատակից եղբայր` խոնարհաբար խնդրում եմ աղոթքի ճամփով Ձեր օժանդակությունը, որպեսզի Տերն ինձ առաջնորդի իմ նոր առաքելության մեջ»:
Ֆրանցիսկոս պապը, եզրափակելով նամակը, նշում է. «Միության եւ գործակցության ճամփով մենք պետք է միասին աշխատենք` հանուն աշխարհի խաղաղության եւ աղքատներին, տկարներին եւ տառապողներին նվիրված ծառայության»: