1 րոպեի ընթերցում
ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: ԱՄՆ փոխնախագահ Ջո Բայդենն Այովայի համայնքների պալատի կազմակերպած հանդիսավոր արարողության ժամանակ սխալմամբ իրեն նախագահ է հայտարարել: Ինչպես տեղեկացնում է«Արմենպրես»-ը`վկայակոչելով ռուսական լրատվամիջոցները, Ջո Բայդենը հանդես է եկել ելույթով, որպեսզի ընդգծի նահանգի կարեւոր դերը 2008 եւ 2012 թվականներին Բարաք Օբամայի նախագահ ընտրվելու գործում:
«Ես հպարտ եմ Միացյալ Նահանգների նախագահ լինելու համար»,- հայտարարել է Բայդենը, ինչն առաջացրել է հավաքվածների ծիծաղը: Իրեն ուղղելով՝ Բայդենը նշել է, որ ինքը հպարտ է Միացյալ նահանգների փոխնախագահ լինելու համար եւ առավել հպարտանում է, որ նախագահ Օբաման է իրեն ընտրել որպես փոխնախագահ:
Բայդենի այս հայտարարության մեջ լրագրողներն ակնարկ են տեսնում` ենթադրելով, որ Բայդենը կարող է նախագահի իր թեկնածությունն առաջադրել 2016 նախագահական ընտրություններում: 2013թ հունվարի 21-ին Ջո Բայդենը երկրորդ անգամ նշանակվեց ԱՄՆ փոխնախագահի պաշտոնում: