2 րոպեի ընթերցում
ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: Զինյալներն ականապատ մեքենա են պայթեցրել Դամասկոսի մոտակայքում գտնվող Սայիդա Զեյնաբ արվարձանում: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, տեղի ոստիկանությունից հայտնել են, որ զոհվել է երեք եւ վիրավորվել տասնյակ քաղաքացիներ:
Սիրիայի զինված ուժերը կանխել են զինյալների կողմից կազմակերպված հերթական պայթյունը Սայիդա Զեյնաբ եւ Բահդալիա արվարձանների միջեւ:
Դամասկոսի Միդան շրջանում զինյալների արձակած ռումբերն ընկել են բնակելի շինության վրա, որի հետեւանքով մեկ կին եւ երեխա է զոհվել, վիրավորվել է եւս երկու քաղաքացի: Պայթյունի հետեւանքով մեքենաներ եւ շինություններ են վնասվել:
Հալեպ քաղաքի Մրջե շրջանում զինյալները կրակ են բացել հանրահավաքի մասնակիցների ուղղությամբ, ովքեր պահանջել են զինյալներին հեռանալ իրենց շրջանից: Արդյունքում երկու մարդ է զոհվել, կան նաեւ վիրավորներ:
Ընդդիմադիր աղբյուրները տեղեկացնում են, որ Սիրիայի «Ազատ բանակը» վերահսկողություն է հաստատել Թուրքիայի սահմանի մոտակայքում գտնվող Հասաքե շրջանի Ռաս ալ Այն գյուղաքաղաքի վրա: Աղբյուրի տեղեկացմամբ` բախումների ընթացքում տասնյակ մարդիկ են զոհվել:
«Ալ Ջազիրա»-ն տեղեկացնում է, որ նոյեմբերի 8-ին Սիրիայի տարածքում կառավարական ուժերի ռմբակոծության հետեւանքով զոհվել է ավելի քան 84 մարդ: