2 րոպեի ընթերցում
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Սիրիայում զինյալների դեմ պայքարը շարունակվում է Դամասկոսի արվարձաններում եւ մոտակա գյուղերում: Հարասթա եւ Հաջիրա գյուղերում ոչնչացվել են զինյալների զենքերով լի մեքենաներ: Նրանցից շատերը ձերբակալվել են եւ սպանվել: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, բախումներ են տեղի ունեցել Սայիդա Զեյնաբի մոտակայքում: Զինված խմբավորման բոլոր անդամները ոչնչացվել են, նրանց հետ նաեւ` խմբավորման ղեկավարը:
Հաջիրայի շրջանում ականապատ մեքենա է պայթել, ինչի հետեւանքով զինյալներ են սպանվել եւ վիրավորվել:
Պաղեստինցի փախստականների Յարմուք ճամբարում պաղեստինցիները թույլ չեն տվել զինված խմբավորմանը մուտք գործել ճամբար եւ տեղի ունեցած բախումների հետեւանքով զինյալներ են վիրավորվել: Զինյալների կողմից սպանվել է սիրիացի երիտասարդ դերասան Մուհամմադ Ռաֆեան:
Բախումները շարունակվում են նաեւ Հալեպում: Լիրմուն եւ Բաբ Անտակիա շրջաններում, ինչպես նաեւ Սուքքարի եւ Քալլասա թաղամասերում տասնյակ զինյալներ են սպանվել եւ վիրավորվել: «Ալ Ջազիրա»-ն տեղեկացնում է, որ նոյեմբերի 4-ին Սիրիայի տարածքում, մասնավորապես` Դամասկոսի գյուղերում եւ Իդլեբում 179 մարդ է զոհվել կառավարական ուժերի օդային ռմբակոծությունների հետեւանքով: Կայքի տեղեկացմամբ` տասնյակ զոհեր եւ վիրավորներ կան Յարմուքում: