3 րոպեի ընթերցում
ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: Սերբ ռեժիսոր Գորան Ռադովանովիչը ֆիլմ է նկարահանել Կուբայի հեղափոխության մասին, որը ներկայացված է «Ոսկե ծիրան» երեւանյան միջազգային 9-րդ կինոփառատոնի միջազգային վավերագրական մրցույթում: Ֆիլմ նկարահանելը բազմաթիվ դժվարություններ է առաջացրել: «Նախ ես շատ վատ գիտեի իսպաներեն, հետո էլ լավ չէի պատկերացնում, թե ինչ է եղել»,- ասաց Ռադովանովիչը` հուլիսի 13-ին լրագրողների հետ հանդիպման ժանանակ` հավելելով, որ նա փորձել է մաքսիմալ հասկանալ տեղի բնակիչների արխեատիպը: Այն պահին, երբ հասկացել է, որ էլ տարբերակ չունի եւ պետք է նկարահանի ֆիլմը, սկսել է կամաց-կամաց ուսումնասիրել, սկսել գտնել նմանություն Կուբայի եւ Սերբիայի միջեւ: «Շնորհակալություն իմ կոմունիստ մանկությանը»,- կատակեց ռեժիսորը: Ռադովանովիչը, ծանոթանալով Կուբայի իրականությանը, տեսել է, որ մարդիկ այնտեղ երբեք չեն շարժվում. որտեղ ծնվում են, այնտեղ էլ մահանում են: «Ունեն վախ բոլոր համակարգերի նկատմամբ: Այնտեղ ամեն ինչ հասարակական է, ոչ անձնական: Եվ ես այդ ամենը փորձել եմ պատկերավոր ցույց տալ, այնպես ինչպես կուբացին կնկարահաներ»,- ասաց նա: Ռեժիսորը ցանկություն ունի նաեւ Հայաստանի մասին ֆիլմ նկարահանել, սակայն մինչ այդ ցանկանում է մեկ տարի այստեղ ապրել, ծանոթանալ հայերի հետ:
«Ֆիդելի հետ, ինչ էլ որ լինի» ֆիլմը Սիերրա Մաեստրայի բնակիչների ճակատագիրը պատկերված է գաղափարախոսական էքստազի օրը` Կուբայի հեղափոխության 52-րդ տարեդարձին: Հաջորդ օրը, իներցիայի ուժով, բոլորը վերադառնում են առօրյա ռիթմին, որն անփոփոխ է եւ ոչ այնքան խոստումնալից: Բոլորն էլ գիտեն դա: Նույնիսկ բարձրախոսները, որոնք շարունակ 52 տարվա վաղեմության գաղափարական կարգախոսներ են հնչեցնում: Հեղափոխությունը շարունակվում է եւ դեռ չգիտի` որքան: