Nvidia-ի տնօրենների խորհուրդը քննարկում է Հուանգի հնարավոր պաշտոնանկության հարցը. Reuters
4 րոպեի ընթերցում
Nvidia-ի տնօրենների խորհուրդը նոյեմբերի 10-ի ուշ երեկոյան նիստ է հրավիրել՝ որոշելու ընկերության գլխավոր գործադիր տնօրեն Ջենսեն Հուանգի հնարավոր պաշտոնանկության հարցը։ «Արմենպրես»-ի հաղորդմամբ` այս մասին Reuters-ին հայտնել է հարցին ծանոթ աղբյուրը։
Nvidia-ն դեռ չի արձագանքել տնօրենների խորհրդի նիստի վերաբերյալ մեկնաբանություն ստանալու հարցմանը։
Արհեստական բանականության չիպերի աշխարհի առաջատար մատակարար ընկերությունը հայտնվել է իր երկարամյա ղեկավարի՝ ամուսնական դավաճանության երկու դեպքի վերաբերյալ հրապարակումների կենտրոնում։
Nvidia-ի բաժնետոմսերի գինը նվազել է ավելի քան 8%-ով այն բանից հետո, երբ The Wall Street Journal-ը հայտնել էր, որ ընկերությունը պատրաստվում է պաշտոնանկ անել Հուանգին։ Եթե անկումը պահպանվի, ընկերության շուկայական արժեքը կնվազի շուրջ 600 միլիարդ դոլարով։ Այս կորուստը կգումարվի այն անկմանը, որն արձանագրվել է այն բանից հետո, երբ տնօրենների խորհուրդը հայտարարել էր չինացի լրտես լինելու մեջ կասկածվող գործարարուհի Ալիս Հուանգի հետ Ջենսեն Հուանգի կապի առնչությամբ հետաքննություն սկսելու մասին։
Ալիս Հուանգը ղեկավար պաշտոններ է զբաղեցրել Շանհայում գործող ներդրումային ընկերություններից մեկում և կարիերա կառուցել Չինաստանի ֆինանսական ոլորտում՝ նախքան արհեստական բանականության չիպերի ոլորտ տեղափոխվելը։ Նա դարձել է Սինգապուրում գործող Megaspeed International ամպային հաշվարկների ընկերության վերահսկիչ բաժնետերը։
The New York Times-ը նախորդ ամիս հայտնել էր, որ ԱՄՆ իշխանությունները եկել են այն եզրակացության, որ նա Չինաստանի հետախուզական ծառայությունների գործակալ է եղել և Nvidia-ի գլխավոր գործադիր տնօրենի հետ սերտ հարաբերություններ հաստատելու ընթացքում տեղեկություններ է փոխանցել Պեկինին։
Ջենսեն Հուանգի՝ Nvidia-ից հնարավոր հեռանալը կարող է ղեկավարության վակուում առաջացնել շուրջ 4 տրիլիոն դոլար շուկայական արժեք ունեցող ընկերությունում, քանի որ չկա նրա ակնհայտ իրավահաջորդը։
63-ամյա Հուանգին է պատկանում Nvidia-ի բաժնետոմսերի շուրջ 3.6%-ը։ Reuters-ը հայտնում է, որ նա ունի խիստ վերահսկողությունը ավելի քան երեք տասնամյակ առաջ իր իսկ հիմնադրած ընկերության նկատմամբ։
Նոյեմբերի 8-ին՝ աշխատակիցներին ուղղված նամակում Հուանգը խոստովանել էր, որ դավաճանել է կնոջը՝ հայտարարելով, որ «ամբողջությամբ պատասխանատվություն է ստանձնում» իր արարքի համար, սակայն որևէ այլ տեղեկություն չի ներկայացրել այդ հարաբերությունների վերաբերյալ։
Nvidia-ի տնօրենների խորհուրդը հետաքննություն է սկսել՝ պարզելու, թե արդյոք Հուանգը դարձել է օտարերկրյա հետախուզական գործողությունների թիրախ։
ԱՄՆ նախագահ Դոնալդ Թրամփը հայտարարել է, որ Հուանգի հետ չի քննարկել այդ մեղադրանքները, սակայն աջակցություն է հայտնել Nvidia-ի ղեկավարին՝ նրան անվանելով «պատվարժան մարդ» և նշելով, որ նա «զարմանալի աշխատանք է կատարել մեր երկրի համար»։