Հայաստանն ու ԱՄՆ-ն քննարկել են փրկարարների համատեղ ուսումնավարժություններ անցկացնելու հնարավորությունը

Հայաստանի ՆԳՆ փրկարար ծառայության և ԱՄՆ Պետդեպարտամենտի ներկայացուցիչները քննարկել են փրկարարների մասնագիտական վերապատրաստման, համատեղ ուսումնավարժությունների կազմակերպման և արտակարգ իրավիճակներին արձագանքելու ոլորտում համագործակցության ընդլայնման հնարավորությունները։

«Արմենպրես»-ի փոխանցմամբ՝ հարցերը քննարկվել են ՆԳՆ փրկարար ծառայության տնօրեն, ներքին գործերի նախարարի տեղակալ Արամ Ղազարյանի և ԱՄՆ Պետդեպարտամենտի տարածաշրջանային գրասենյակի աղետների և հումանիտար արձագանքման բյուրոյի տնօրեն Բրայան Բրեուհաուսի հանդիպմանը։

Ղազարյանը կարևորել է արտակարգ իրավիճակներին պատրաստվելու և արձագանքելու կարողությունների զարգացումն ու միջազգային փորձի կիրառումը։ Զրուցակիցներն անդրադարձել են նաև համայնքների դիմակայունության ամրապնդմանը, մասնագիտական փորձի փոխանակմանն ու համատեղ նախաձեռնություններին։ Բրեուհաուսն ընդգծել է Հայաստանի փրկարար ծառայության հետ համագործակցության կարևորությունը։