Շիրակի մարզում անցկացվել է «ՀՀ վարչապետի գավաթ» դպրոցականների լողի մրցաշարի ընտրական փուլը

Գյումրիի ջրային մարզաձևերի մանկապատանեկան մարզադպրոցի լողավազանում հոկտեմբերի 14-ին անցկացվել են «ՀՀ վարչապետի գավաթ» դպրոցականների լողի մրցաշարի Շիրակի մարզի ընտրական փուլի մրցումները։ Ինչպես «Արմենպրես»-ը տեղեկանում է Շիրակի մարզպետի աշխատակազմից, մրցաշարն անցկացվել է երկու տարիքային խմբով՝ 4-7-րդ դասարանների (2014-2017 թթ. ծնվածներ) և 8-12-րդ դասարանների (2009-2013 թթ. ծնվածներ) աշակերտների միջև: Կրտսեր տարիքային խմբի մասնակիցները մրցել են 50 մետր, իսկ ավագ տարիքային խմբի մասնակիցները՝ 100 մետր ազատ ոճում։

Մրցումների արդյունքներով կձևավորվի Շիրակի մարզի հավաքական թիմը, որի կազմում յուրաքանչյուր տարիքային խմբում կընդգրկվեն 4 տղա և 4 աղջիկ։

Մարզի հավաքականը նոյեմբերի 20-21-ը Կոտայքի մարզի Ծաղկաձոր քաղաքում կմասնակցի հանրապետական եզրափակիչ մրցաշարին, որտեղ կրտսեր և ավագ տարիքային խմբերի մասնակիցները կմրցեն համապատասխանաբար 8×50 մետր և 8×100 մետր ազատ ոճով փոխանցումալողերում։