Առողջության ապահովագրության շրջանակում մինչև տարեվերջ մարման ենթակա հաշիվները կարող են գերազանցել 200 մլրդ դրամը
4 րոպեի ընթերցում
Առողջության համընդհանուր ապահովագրության շրջանակում 2026 թվականի սկզբից մատուցված ծառայությունների դիմաց վճարումների ընդհանուր ծավալը գերազանցել է 150 միլիարդ դրամը, իսկ մինչև տարեվերջ մարման ենթակա հաշիվները կարող են հասնել, անգամ՝ գերազանցել 200 միլիարդ դրամը։ «Արմենպրես»-ի հաղորդմամբ՝ Կառավարության նիստում այս մասին հայտարարել է առողջապահության նախարարի տեղակալ Սամվել Խարազյանը։
Խարազյանի խոսքով՝ այս պահի դրությամբ առողջության ապահովագրության համակարգում ընդգրկված է 1 միլիոն 815 հազար մարդ։ Ապահովագրվածների շուրջ 50 տոկոսը կամ մոտ 850 հազար քաղաքացի արդեն օգտվել է առողջապահական ծառայությունից կամ ստացել դեղորայք։
Առողջության համընդհանուր ապահովագրության հիմնադրամը փոխհատուցումներ է կատարել քաղաքացիներին սպասարկած բժշկական կազմակերպություններին և դեղատներին։ Ներառյալ օգոստոսին ներկայացված կատարողականները՝ վճարումներն ամբողջությամբ կատարվել են։
Փոխվարչապետ Մհեր Գրիգորյանն իր հերթին նշել է, որ առկա ցուցանիշները հաշվի առնելով՝ մինչև տարեվերջ մարման ենթակա հաշիվների ծավալը կարող է հասնել շուրջ 200 միլիարդ դրամի։
«Միգուցե մի փոքր ավելի, որովհետև սեզոնայնությամբ պայմանավորված՝ աշնան շրջանում, քրոնիկ հիվանդությունների սրացումների և այլ բարդությունների առաջացման հետևանքով, ծավալը կարող է ավելանալ։ Բայց այն կառավարման շրջանակում է։ Ապահովագրության հիմնադրամի բյուջեի շրջանակում ծախսերը կառավարելի կլինեն։ Մենք մեր կանխատեսումներից չենք շեղվել»,- արձագանքել է Առողջապահության նախարարի տեղակալը։
Նրա խոսքով՝ հիմնադրամի բյուջեով նախատեսված եկամուտների և ծախսերի մասով շեղումներ չեն կանխատեսվում։ Բժշկական հաստատություններն ամբողջությամբ սպասարկում են համակարգը, սակայն առանձին նեղ մասնագիտական ծառայությունների դեպքում հերթեր են առաջացել։ Խարազյանը դա պայմանավորում է այն հանգամանքով, որ քաղաքացիներն իրենք են ընտրում բուժհաստատությունն ու բժշկին, և հաճախ նախապատվություն են տալիս միևնույն մասնագետներին։
Նիստում քննարկվել է նաև ռեզիդենտության հիմքով քաղաքացիներին ապահովագրության շահառու ճանաչելու գործընթացը։ Առողջապահության նախարարությունն այդ հարցով աշխատել է Ազգային անվտանգության ծառայության և էլեկտրոնային առողջապահական համակարգը սպասարկող ընկերության հետ։ Խարազյանի խոսքով՝ անհրաժեշտության դեպքում խնդիրը կկարգավորվի նաև օրենսդրական փոփոխություններով։
Աշխատանքի և բարեկեցության նախարար Արսեն Թորոսյանն առաջարկել է թվայնացնել նաև կենսաթոշակ և նպաստ ստացող քաղաքացիների՝ Հայաստանում գտնվելու փաստի ստուգումը, որպեսզի նրանք այլևս ստիպված չլինեն տարեկան մեկ անգամ այցելել բանկ։
Նրա խոսքով՝ խնդիրը հատկապես վերաբերում է մի քանի քաղաքացիություն ունեցող անձանց, որոնք սահմանը կարող են հատել ոչ Հայաստանի քաղաքացու անձնագրով և այդ պատճառով չնույնականացվել համապատասխան համակարգերում։
Մհեր Գրիգորյանն ընդգծել է, որ էլեկտրոնային տվյալների շտեմարանը պետք է կարգավորել այնպես, որ ռեզիդենտության հարցը լուծվի ավտոմատ՝ առանց քաղաքացու լրացուցիչ գործողությունների։