1 րոպեի ընթերցում
Իրանի նախագահ Մասուդ Փեզեշքիանը հայտարարել է մուսուլմանական երկրների միջև ոչ բավարար չափով տնտեսական համագործակցության մասին՝ կոչ անելով շտկել իրավիճակը: «Արմենպրես»-ի փոխանցմամբ՝ այս մասին հաղորդում են իրանական պետական ԶԼՄ-ները։
«Խմբի ներսում արտահանումը կազմում է ընդամենը 19%, ինչը նշանակում է, որ մուսուլմանական մեծամասնություն ունեցող երկրների արտահանման ավելի քան 80%-ը դեռևս դուրս է գալիս երկրների մեր խմբից», - հայտարարել է նա՝ հանդես գալով Թեհրանում ընթացող Իսլամական միասնության միջազգային խորհրդաժողովում։
Այս առումով Փեզեշքիանը Իսլամական համագործակցության կազմակերպության (ԻՀԿ) 57 անդամ երկրներին կոչ է արել ամրապնդել տնտեսական փոխգործակցությունը։
Իրանի նախագահն ընդգծել է, որ այդ երկրները գտնվում են կարևոր ծովային և ցամաքային ճանապարհների սրտում, ունեն էներգետիկ ռեսուրսներ, երիտասարդ բնակչություն և մեծ շուկա։
Փեզեշքիանը ԻՀԿ-ի անդամներին կոչ է արել միասին աշխատել՝ չնայած տարաձայնություններին։ Նրա խոսքով՝ ոչ մի մուսուլմանական երկիր իր անվտանգությունը չպետք է ամրապնդի հարևան պետությունների մոտ դրա բացակայության հաշվին, և նրանց տարածքները չպետք է օգտագործվեն ի վնաս մյուս մուսուլմանական երկրների։