1 րոպեի ընթերցում
Կատարի վարչապետ և արտաքին գործերի նախարար շեյխ Մոհամմեդ բին Աբդուլռահման բին Ջասիմ Ալ Թանին օգոստոսի 26-ին հեռախոսազրույց է ունեցել Իրանի արտգործնախարար Աբբաս Արաղչիի հետ։ Ինչպես հաղորդում է «Արմենպրես»-ը՝ վկայակոչելով QNA գործակալությունը, այս մասին հայտնել է Կատարի արտաքին գործերի նախարարությունը։
«Նրանք քննարկել են տարածաշրջանային վերջին զարգացումները, մասնավորապես՝ Օմանի Սուլթանության և Իրանի Իսլամական Հանրապետության միջև ընթացող բանակցությունները՝ Հորմուզի նեղուցով ժամանակավոր համատեղ նավագնացության միջանցք ստեղծելու, ինչպես նաև նեղուցից ականները մաքրելու համատեղ ծրագրի շուրջ», — ասվում է նախարարության հայտարարության մեջ։
Ալ Թանին հեռախոսազրույցի ընթացքում ընդգծել է «Կատարի պետության լիակատար աջակցությունը դիվանագիտական ջանքերին և բոլոր այն նախաձեռնություններին, որոնք ուղղված են ծովային նավագնացության ազատությունն ապահովող լուծում գտնելուն, ինչպես նաև տարածաշրջանում կայուն խաղաղություն երաշխավորող համաձայնության հասնելուն»։