Իրանի խորհրդարանի խոսնակը հայտնել է ԱՄՆ-ի «անարդար պատժամիջոցները» հաղթահարելու անհրաժեշտության մասին
2 րոպեի ընթերցում
Իրանի խորհրդարանի խոսնակ Մոհամմադ Բաղեր Ղալիբաֆն Իրաք կատարած այցի ընթացքում հայտարարել է, որ Իրանը պետք է ծրագրեր կազմի՝ հաղթահարելու երկրի դեմ ԱՄՆ-ի կողմից նախատեսվող դաժան պատժամիջոցները։ «Արմենպրես»-ի փոխանցմամբ՝ այս մասին հաղորդում է Al Jazeera-ն։
«Եթե նայեք մուսուլմանական երկրների ռեսուրսներին և հումքին, կհասկանաք, որ մեր թշնամիները գալիս են դրանք թալանելու։ Հետևաբար, մենք պետք է ծրագրեր կազմենք անարդար պատժամիջոցների դեմ պայքարելու համար, որպեսզի կարողանանք դրանք հաղթահարել», - ասել է նա։
Ղալիբաֆը կոչ է արել Թեհրանի և Բաղդադի միջև ավելի ուժեղ տնտեսական կապեր հաստատել։
Ավելի վաղ ԱՄՆ ֆինանսների նախարար Սքոթ Բեսենթը հայտարարել էր, որ Վաշինգտոնն Իրանի դեմ կկիրառի «պատմության մեջ ամենախիստ պատժամիջոցները»՝ կենտրոնանալով տնտեսական միջոցառումների վրա, որոնք, նրա կարծիքով, կնվազեցնեն Թեհրանի դեմ նոր խոշոր ռազմական գործողությունների անհրաժեշտությունը։
Բեսենթի խոսքերը հնչել են ԱՄՆ նախագահ Դոնալդ Թրամփի այն հայտարարությունից հետո, որ Իսլամական Հանրապետությանը որևէ աջակցություն տրամադրող երկրները կբախվեն «ահռելի տնտեսական հետևանքների»։